VAN TUYO MANG-KIDNAP SANG MGA BATA?

2 ka bata sa Concepcion gindulogan sang van kag ginhaylo nga magsakay

Hublas nga Kamatuoran - - Unang Pahina - Ime SORNITO

Syudad sang ILOILO – Nagdangop sa mga pulis ang amay sang mag-utod nga mga bata matapos nga sunu sa ila gindulogan sila sang van sa Barangay Bakhawan Sur, Concepcion, Iloilo alas- 11: 30 sang aga kahapon.

Base naman sa report sang Concepcion PNP, nagalakat ang mag-utod nga ginkilala lang kanday Eva Jane, 11, grade 6 pupil, kag Regilyn, 9, grade 4, padulong sa patyo sang gindulogan sila sang duag itom kag green nga van sa diin sakay ang lima ka mga persona.

Gin-alegar sang magutod nga ginbuksan sang mga tawo ang van kag ginhagad sila nga magsakay apang nakulbaan sila rason nga nagdalagan sila padulong sa ila balay kag nagpanugid sa ila amay nga amo naman ang nagreklamo sa kapitan sang ila barangay angut sa natabu.

Dayon man nga nagdangop sa Concepcion PNP ang amay kaupod ang mga opisyales sang barangay para maimbestigaran ang natabu.

Nahibaluan pa nga lunch break sang Bakhawan Sur Elementary School sang nagluntad ang insidente.

Samtang, indi ini ang una nga insidente sang pagdulog sang salakyan sa mga kabataan bangod sadtong Agusto 18, nagreklamo ang 15-anyos nga estudyante nga gintuyo man sia pasakyon sa SUV sang wala nakilal-an nga mga persona sa atubang sang simbahan sa ditrito sang La Paz, Syudad sang Iloilo pero nakadalagan sia kag nakapangayo sang bulig sa mga pulis.

Sang nagligad naman nga Septyimbre 8, ginsulod sang duha ka persona ang Barroc Elementary School sa Barangay Barroc, Tigbauan, Iloilo.

Sunu kay Senior Insp. Hermogenes Eulatic, hepe sang Tigbauan PNP, nagdangop sa ila istasyon ang ginikanan sang grade 6 nga bata nga babaye matapos nga gintuyo ini nga i- abduct sang lalaki nga nagataas sang mga 5’4” kag chubby kag babaye nga blond ang buhok.

Gintuyo sang suspek nga lalaki nga butongon ang kamot sang bata pero maswerte lang nga nagapanguyat ang kamot sini sa haligi sang canopy sang eskwelahan rason nga wala nadala./ PB

Newspapers in Tagalog

Newspapers from Philippines

© PressReader. All rights reserved.