Mga senador ipakigbatu budget sang CHR

Hublas nga Kamatuoran - - Nasyonal -

Indi dapat madulaan sang paglaum ang Commission on Human Rights (CHR) bangod ipakigbatu sang pila ka mga senador ang ila nga budget para sa 2018.

Kasunod ini sang pag-apruba sang mga kongresista sang P1,000 nga budget para sa CHR.

Ginpasalig sang pila ka mga senador nga kontrahon nila ang ginaduso nga budget para sa CHR, ang ahensya nga nagaimbestigar sa human rights violations kontra sa mga pigado kag marginalized nga sektor sang sosyodad.

Sunu kay Sen. Francis “Chiz” Escudero nga ipakigbatu niya ang pagbalik sang budget sang CHR, “however inconvenient it may be for some.”

Para naman kay Sen. Bam Aquino, dapat pasugtan ang CHR nga maka- obra sang ila trabaho sa pihak sang “numerous deaths and reports of police abuses.”

Sunu man kay Sen. JV Ejercito nga importante ang CHR kag klaro ini nga nakabutang sa kasugoan.

Si Sen. Panfilo Lacson nagdugang nga sigurado sia nga may matapakan sa isyu pero nagapati sia nga makakuha sang suporta ang CHR sa bicameral conference committee.

Nahibaluan nga sang Lunes gin- aprubahan sang Senate finance committee ni Lacson ang P678 milyon nga pundo para sa CHR sa 2018 nga nagalakip sa P28.565 milyon nga pundo para sa Human Rights Violations Victim’s Memorial Commission.

Ginhambal naman ni Sen. Sonny Angara nga ang CHR ang nakadiskubre sang sekreto nga prisohan sa sulod sang station 1 sang Manila Police District sang Abril. Na-priso didto ang mga tawo nga nagahulat sang ransom para mahilway.

Nagpromisa man si Sen. Francis “Kiko” Pangilinan nga kontrahon ang ginaduso sang mga kongresista.

Sadtong Martes ginpaboran sang 119 ka mga kongresista ang pagpasar sang P1,000 nga budget para sa CHR samtang 32 ang namalabag.

Pero apisar sang gamay nga pundo, ginhambal sang CHR nga indi sila magdulog para mag- obra sang ila Constitutional duty kag padayun nga nagapati “the concern for human rights is beyond partisanship or disagreement.” ( Photo courtesy of House of Representatives)/ PB

Newspapers in Tagalog

Newspapers from Philippines

© PressReader. All rights reserved.