PRO-6 mahiwat ‘run for a cause’ para kay Sustento

Hublas nga Kamatuoran - - Balita - @ wNi Ime SORNITO

Syudad sang ILOILO – Magahiwat sang “run for a cause” ang Police Regional Office (PRO) 6 para makasuporta sa legal battle ni Chief Inspector Charlie Sustento, hepe sang Ajuy Police Station, kag sang tatlo ka iban pa nga mga pulis nga gindismiss sang Office of the Ombudsman.

Kabuylog sang PRO-6 nga nagplano sang “run for a cause” nga ginatawag “Dalagan Suporta sa Kapulisan” ang Regional Advisory Council.

Dulolongan nga hiwaton ang “Dalagan Suporta sa Kapulisan” sa tanan nga mga probinsya sakop sang rehiyon 6 sa Sabado humalin alascinco tubtob alas- otso sang aga.

Hambal ni Supt. Gilbert Gorero, tagpamaba sang PRO- 6, ang nasambit nga “run for a cause” nagatuyo nga makatipon sang pundo nga ibulig sa mga pulis nga may gina- atubang nga mga kaso administratibo samtang naga-obra sang ila obligasyon.

Bangod sini, ginaengganyo sang PRO-6 ang tanan nga magpasakop sa aktibidad para mabuligan si Sustento kag sanday Police Officer 3 Ramon Baylon Jr., Police Officer 2 Joebert Detorio kag Police Officer 1 John Dimzon nga nangin guilty sa kaso nga grave misconduct kag conduct unbecoming of police officers.

Ang maluyag magpasakop sa aktibidad mahimu nga makaparehistro sa pinakamalapit nga istasyon sang pulis. Ang registration fee para sa mga sibilyan sa 5km. run yara sa P150 samtang sa mga estudyante yara sa P75 kag sa 3km. P100 sa mga sibilyan samtang P50 sa mga estudyante. Separado naman ang bayad nga P250 para sa t-shirt sang mga gusto nga maka-avail.

Para sa dugang pa nga mga detalye sang aktibidad, mahimu lang magbisita sa Facebook page nga Dalagan Suporta sa Kapulisan./ PB

Newspapers in Tagalog

Newspapers from Philippines

© PressReader. All rights reserved.