Publiko ginapa-alerto kontra sa van nga tuyo mang-abduct

Hublas nga Kamatuoran - - Balita - Ni Ime SORNITO

Syudad sang ILOILO – Bangod sang asud-asod nga reklamo angut sa tuyo nga pag-abduct sang wala makilal-an nga mga persona sa mga kabataan, ang Police Regional Office ( PRO) 6 nagapa- alerto kag nagapahalong sa publiko ilabi na sa mga ginikanan.

Ginmandoan ni Chief Supt. Cesar Hawthorne Binag, regional director sang PRO- 6, ang Iloilo Police Provincial Office ( IPPO) kag Iloilo City Police Office ( ICPO) nga imbestigaran ang insidente sa Concepcion kag Tigbuan sa probinsya sang Iloilo kag distrito sang La Paz sa Syudad sang Iloilo angut sa tuyo nga pag- abduct sa mga kabataan nga naga- eskwelaha sa elementarya.

Ginmandoan man ni Binag ang IPPO kag ICPO nga magdugang sang ila puersa sa mga eskwelahan nga masami ginapadulongan sang van nga nagapasakay sa mga kabataan.

Angut sini, ang IPPO kag ICPO nagpanugyan man sa publiko nga maghalong kag mag- alerto sa mga tawo sa palibot.

“Amon ginapanugyanan ang tanan nga mangin security conscious nga tumanon ang mga nabutang sa masunod nga antikidnapping infographic sang Philippine National Police agud malikawan ang mga kasubong nga insidente,” sandig sa Facebook post sang IPPO.

Ginapanugyan man nila sa mga ginikanan nga bantayan ang ila mga kabataan kag mangin mahinalungon sa mga tawo nga ila ginasaligan kasubong sang mga traysikad ukon traysikol drayber nga nagasugat kag nagadul-ong sang ila mga kabataan.

Labi sa tanan, gilayon nga mag- report sa pinakamalapit nga istasyon sang pulis kon may mabaton nga impormasyon angut sa nagalagaw nga mga van.

Sa bahin sang ICPO, nagpanugyan sila sa mga ginikanan nga makig-angut gid sa mga gwardiya kag manunudlo subongman ipahibalo kon sin-o ang masugat sang ila mga kabataan.

Dapat nga hambalan sang mga ginikanan ang ila mga kabataan nga maghulat lamang sa sulod sang eskwelahan sang ila sugat kag indi gid maggwa nga isahanon para indi mapalapitan sang malain nga mga persona.

Sunu pa sa ICPO ipahanumdom man sa mga kabataan nga indi pag- ipakita ang ila mga malahalon nga gamit para indi makaganyat ang mga kriminal.

Labi sa tanan, indi dayon magbaton sang tanyag kon pasakyon sa salakyan ilabi na sa van ukon awto kon indi nila kilala ang mga tawo nga magpalapit sa ila./ PB

Ang computer composite sketch sang isa sa mga suspek sa tuyo nga abduction sa banwa sang Tigbauan, Iloilo. Ang sketch ginbase sa paglaragway sang traysikad drayber nga naga-alegar naka-istorya sa wala nakilala nga mga suspek nga ang isa babaye. (Laragway sang IPPO)/PB

Newspapers in Tagalog

Newspapers from Philippines

© PressReader. All rights reserved.