Taxi nakabunggo sa poste

Hublas nga Kamatuoran - - Unang Pahina - Ni Ime SORNITO

Syudad sang ILOILO – Nakaagom sang minor nga mga samad sa lawas ang drayber sang taxi matapos nga nakabunggo ini sa poste sang streetlight sa Barangay Bolong Oeste, Sta. Barbara, Iloilo alas4: 15 sang kaagahon kahapon.

Gindala sa St. Therese Hospital sa syudad ang drayber nga si Edwin Morga, 34, kag taga- Brgy. Tigbauan Road, Cabatuan, Iloilo, bangod sang mga samad sa kamot kag lawas.

Base sa imbestigasyon sang Sta. Barbara PNP, mapadulong na kontani ang taxi sa Iloilo International Airport sang nadulaan sang kontrol sa pagmaneho ang drayber tubtob nga nagsaka sa gutter kag nakabunggo sa duha ka poste sang streetlights kag nagbalik sa sidewalk.

Nagkalagupi ang ulohan sang taxi nga samtang ginasulat ining balita yara pa sa sidewalk sang Brgy. Bolong Oeste.

Sunu naman kay Senior Inspector Rey Pabalan, hepe sang Sta. Barbara PNP, indi hubog si Morga pero napiyongan lang samtang nagamaneho./

(Laragway ni Ian Paul Cordero)/PB

NAGKALAGUPI ang ulohan sining taxi subongman nasamaran ang drayber nga si Edwin Morga makaligad nga nakabunggo ini sa poste sang streetlight kag nagsaka sa gutter sang dalan sa Barangay Bolong Oeste, Sta. Barbara, Iloilo kahapon sang kaagahon.

Newspapers in Tagalog

Newspapers from Philippines

© PressReader. All rights reserved.