Mga kontrabando nakumpiskar sa IDJ

Hublas nga Kamatuoran - - Balita - Ni Ime SORNITO

Syudad sang ILOILO – Pila ka mga kontrabando ang nakumpiskar sa ginkasar nga greyhound inspection sang mga otoridad sa Iloilo District Jail (IDJ) sa Barangay Nanga, Pototan, Iloilo alas- 5: 30 sang aga kahapon.

Lakip sa mga narekober nga kontrabando sa Dorm No. 4 kag Special Intensive Care Area (SICA) amo ang anum ka mga cellphones, tooter, empty plastic sachet, mga sigarilyo, kag improvised nga mga patalom.

Sunu kay Jail Supt. Gilbert Peremne, assistant regional director sang Bureau of Jail Management and Penology ( BJMP) 6, nagkasar sila sang greyhound inspection kaupod ang Philippine National Police kag Philippine Drug Enforcement Agency 6 matapos nga nakarekober sila sang walo ka mga plastic sachets sang ginasuspetsahan shabu sa mga selda sang pila ka mga drug personalities sadtong Oktubre 1 sang nagkasar man sila sang greyhound inspection.

Ining inspeksyon sang BJMP-6 natabu isa ka adlaw matapos nga gintingob sa SICA ang high-value target nga mga drug personalities kaangay nanday Marque “Boboy” Acap kag Jesus “Jing-Jing” Espinosa.

Tuyo sang BJMP- 6 nga masiguro nga wala na sang makasulod nga mga kontrabando sa IDJ paagi sa paghiwat sang asud- asod nga mga inspeksyon.

Nagpasalig man si Peremne nga imbestigaran ang nakuha nga mga sim cards sa selda sang mga high- value targets para mabal-an kon sin-o ang ila mga ginakontak.

“We will validate kon ano nga mga contrabands kag kon ano ang makuha. From there we can recommend sa management kon ano ang himuon. Ipa- validate ang sim card kon ano nga messages ang makuha naton,” hambal ni Peremne.

Nagapati man sia nga ang nakita nga mga foil kag empty plastic sachets nga may residue patimaan nga may presensya sang ilegal nga droga sa sulod sang IDJ.

“Kaina may nakita kita nga mga foil kag mga plastic nga may residue. It dictates nga may presensya sang drugs diri, that’s why we conduct greyhound inspection,” dugang ni Peremne./ PB

Newspapers in Tagalog

Newspapers from Philippines

© PressReader. All rights reserved.