Kagawad sa Bakhaw dakop sa drug bust

Hublas nga Kamatuoran - - Unang Pahina - @ wNi Ime SORNITO

Syudad sang ILOILO - Nadakpan sa ginkasar nga buy-bust operation ang isa ka barangay kagawad sang Barangay Bakhaw sa distrito sang Mandurriao alas- 7: 50 sang Martes sang gab-i.

Ginkilala ang suspek nga si kagawad Virgilio Soledad y Coronada alyas Beryong, 59, kasado.

Sandig sa rekord sang Mandurriao PNP, nabaklan sang ila pulis nga nagserbe nga poseur buyer ang kagawad sang isa ka plastic sachet sang ginapasuni shabu balor P700.

Nakumpiskar pa gid diri ang dugang nga 10 ka mga plastic sachets sang gina-alegar shabu kag marked money.

Sunu kay Chief Insp. Juan Tigaroneta, officer- in- charge sang Mandurriao PNP, nadala sadto ang pangalan sang kagawad nga high-value target pero nakakas man ini sang ulihi matapos nga nagsungka sa Oplan Tokhang kag sa Philippine Drug Enforcement Agency.

Pero depensa ni Soledad nga planted ang nakuha nga ginapasuni shabu sang Mandurriao PNP kag City Anti-Illegal Drugs Special Operation Task Group.

“Indi na ya matuod ah. Wala ko ya nagaintra sina,” hambal ni Soledad sa interbyu sang Aksyon Radyo Iloilo.

Sa subong si Soledad nahunong na sa karsel sang Mandurriao PNP kag magapangatubang sang kaso nga pagbayolar sang RA 9165 ukon Comprehensive Dangerous Drugs Act of 2002./ PB

Newspapers in Tagalog

Newspapers from Philippines

© PressReader. All rights reserved.