Pistons gindominar ang Pacers

Hublas nga Kamatuoran - - Unang Pahina -

Ginpatilaw sang Detroit Pistons sa pagpanguna ni Tobias Harris sang ikaapat nga pierde ang Indiana Pacers, 114-97, sa ila hampang sa Little Caesars Arena, Detroit kahapon sang aga (oras sa Pilipinas).

Nag- iskor sang 23 puntos si Harris kag nagbulig man sa pagdaog sang Pistons si Andre Drummond nga may 14 puntos kag 21 rebounds. Bangod sini, abanse na ang Pistons sang tatlo ka daog kontra sa Cleveland Cavaliers sa NBA Central Division. Sa bahin sang Pacers, ginkabos ang ginkamada ni Victor Oladipo nga 21 puntos. Una nga nag-abanse ang Pistons, 59-52, sa halftime kag nakalagas pa ang Pacers para mapatas sa 65 ang iskor. Apang ginsundan ini sang 13-0 run sang Pistons para makontrol na nila ang hampang.

CELTICS GINLAMPASO ANG LAKERS

Ginpamatud-an sang Boston Celtics ang ila kapag-on bisan kulang sila sa tawo matapos nga gintambakan nila ang Los Angeles Lakers, 107-96, sa ila hampang kahapon man sang aga. Nagpanguna sa sining ika-10 nga asud-asod nga daog sang Celtics si Aron Baynes nga may 21 puntos. Sa second quarter, abanse na ang Celtics sang 20 puntos pero nabadbad sang Lakers sa duha ka puntos antes nag-init liwat ang team nanday Kyrie Irving. Sa iban pa nga mga hampang sa NBA, ginpadaog sang anay Phoenix guard nga si Goran Dragic ang Miami Heat kontra sa Suns sa iskor nga 126-115 kon sa diin nag-iskor ini sang 29 puntos. Natilawan man sang New York Knicks ang kapierdehan kontra sa Orlando Magic, 112-99, matapos nga nag-iskor sanday Nikola Vucevic sang 24 puntos kag Evan Fournier sang 23 puntos. Kag gintambakan man sang defending champion nga Golden State Warriors ang Minnesota Timberwolves sa iskor nga 101-125 bisan wala nakahampang si Kevin Durant./

Si Bojan Bogdanovic (44) sang Indiana Pacers nagatuyo nga mag-shoot sang bola bisan ginabantayan ni Reggie Bullock (25) sang Detroit Pistons sa first half sang ila hampang. (Rick Osentoski, USA TODAY Sport)/PB

Newspapers in Tagalog

Newspapers from Philippines

© PressReader. All rights reserved.