MAGNOBYA NADISGRASYA SA MOTOR

Hublas nga Kamatuoran - - Unang Pahina - Ni Ime SORNITO

Syudad sang ILOILO – Patay ang nobyo samtang pilason ang nobya matapos nga nadisgrasya ang ila ginasakyan nga motorsiklo sa Zone 8, Barangay Calumpang sa distrito sang Molo diri pasado alas-tres sang kaagahon kahapon.

Gindeklarar nga dead- onarrival sa Iloilo Doctors’ Hospital si Leo Jalandoni, 20, bangod sang patal nga mga pilas sa ulo kag tuo nga kamot.

Padayun naman nga ginabulong sa ospital ang nobya sini nga si Lavin Jardeleza, 18, bangod sang samad sa magtimbang nga tiil.

Sandig sa imbestigasyon sang traffic investigator sang Molo PNP, gikan sa Villa sa distrito sang Arevalo ang magnobya sakay sa Raider nga motorsiklo nga ginamaneho ni Jalandoni matapos nga nagtambong sa birthday party sang nagluntad ang aksidente.

Gina- alegar naman sang mga testigo nga madasig ang dalagan sang motorsiklo nga mapadulong na kontani sa City Proper pero gulpi lang nawad-an sang kontrol sa pagmaneho si Jalandoni rason nga nakadanlog ang motorsiklo tubtob nga natumba sila sa dalan.

“Sunu diri sa mga bystander self inflicted na sia. Kay ginhaboy sila sa higad sang karsada matapos nga nadulaan sang kontrol,” sunu kay PO2 Ricky Ardamoy sang Molo PNP.

Antes pa man gindala sa ospital ang magnobya,

ginapahayag nga wala na nagahulag ang nobyo bangod nga natam-an gid ang ulo sini.

Ginareklamo man sang mga istambay ang atrasado nga pag- abot sang Iloilo City Emergency Response team sa ginluntaran sang aksidente rason nga nadugayan kag nadala sa ospital ang magnobya.

Newspapers in Tagalog

Newspapers from Philippines

© PressReader. All rights reserved.