Bangkay sang dalagita nasapwan sa sapa

Hublas nga Kamatuoran - - Unang Pahina - Ni Ime SORNITO

Syudad sang ILOILO – Nagahabok na sang nasapwan ang bangkay sang dalagita sa sapa sa Sitio Nabaho, Barangay Camambugan, Dingle, Iloilo alas-tres sang Sabado sang hapon.

Ang biktima nga ginkilala lang kay alyas Inday, 15 anyos kag residente sang Brgy. Camambugan, Dingle, nasapwan sang mga pumuluyo nga wala na sang ginasuksok nga panapton nga nagalutawlutaw sa higad sang sapa.

Base sa imbetigasyon ni Senior Insp. Samuel Vepinosa, hepe sang Dingle PNP, sadtong Nobyimbre 5 pa sang aga ulihi nga nakit-an nga buhi ang biktima nga ginaalegar may diperensya sa paminsaron.

Sunu pa kay Vepinosa nga naglisensya ang biktima sa iya lola nga mangita sang tambo bitbit ang binangon apang wala na ini makabalik sa ila balay.

Pero wala man natingala ang lola nga wala nakapauli ang iya apo bangod nga sa masami sa balay sang iban nila nga mga himata ini nagatinir. Kag amo na lang ang kakibot sang pamilya sang natukiban nga wala na sang kabuhi ang biktima sang nasapwan sa sapa.

Sunu pa sa Dingle PNP nga nakaagom ang biktima sang pilas gikan sa matalom nga bagay apang indi pa madeterminar kon tuga ini sang pagbunu ukon bagras lamang.

Ginpa-idalom man sa autopsy examination ang bangkay sang biktima pero tubtob ginasulat ining balita wala pa makagwa ang resulta sini.

Newspapers in Tagalog

Newspapers from Philippines

© PressReader. All rights reserved.