MAGAPANAGANG

Hublas nga Kamatuoran - - Opinyon - PB Ni Roberto “BERT” LADERA

Nagahara- hara ang transport sector sa Syudad sang Iloilo sa pagduso sang ila kawsa nga pasakaan ang plete sa pampasahero nga salakyan sang kapin sa 3 pesos kag 50 sentimos ukon halos 10 ka pesos gikan sa anay 6 pesos kag 50 sentimos. Bisan sa ila nga hanay wala sila nagahilituhog sa kon pila gid ang angay nga iduso nga saka sa pletehan. Nagasalangisag sila sa pagplastar sa ila tagsa-tagsa ka tindog kag panan-awan sa sini nga bagay. Gikan sa 12 pesos sadto nag-ugdaw sila sa 9 pesos nga ginaduso sang PISTON-Panay nga wala naga-upod sa tuman ka taas nga plete nga 12 pesos. Madamo sang adlaw ang naglipas kag sang sini lang liwat sila nga nagpalabot sang ila pagsugilanon upod sa Land Transportation Franchising and Regulatory Board 6 kag ila nadesisyonan nga himuon nga 10 ka pesos agud kuno nga wala sang waki, wala na sang sensilyo kag wala na sang pagbaisay nga magaluntad sa tunga sang drayber kag sang pasahero. Pigaw sa pagplastar sang masaligan kag mapatihan nga argumento ang grupo ni Boyet Parcon sang Iloilo City Loop Alliance of Jeepney Owners and Drivers Association ukon ICLAJODA. Wala sang mabakud nga balasehan ang ila una nga ginduso nga 12 pesos nga sang ulihi nagpanaog sa 9 pesos kag liwat nga nagsaka sa 10 ka pesos. Indi nila ma- establisar ang mga argumento kag balasehan kon ngaa mapasaka sang plete, kon pila ang angay nga ipasaka sa plete kag ano ang mangin epekto sang pagpasaka sang plete. Nagapahabyog lang sila sang ila ginaduso, daw mga ido nga nagalalaway sa ila pagaangkabon. Kulang sa punto kag argumento apang bastante sa patayog-tayog sang sugid sa tawo. Kontani may pamatuod sila sa ila argumento, may mga datus nga ipakita kag dapat makakumbinse ang mga datus nga ila ginasugid sa tawo kag sa LTFRB. Bangod sa ila pahabyog kag patarasak nga pagduso sa pagpasaka sang pletehan, lauman na ang pagpamalabag diri sang pila ka ahensya sang gobyerno kaangay sang National Economic and Development Authority kag lakip man sang Department of Trade and Industry. Lauman na ang pagpanagang sang mga ahensya sang gobyerno nga may yara sang maathag nga basehan kon ngaa indi matugotan ang pahabyog nga duso sang transport group sa syudad. Lauman na nga iduso sang mga ahensya sang gobyerno ang Php 1.50 nga saka sa pletehan bangod sa ila paglantaw ini ang angay kag base sa mga datus nga yara sa ila paghinakop. Kon tugotan ang pahabyog nga duso sang grupo ni Boyet Parcon, may matuga ini nga malain nga epekto sa iban pa nga mga sangkap sa ekonomiya. Maga- epekto ini sa balor sang mga balaklon kag makabig nga may matuga nga “domino effect.” Kontani nagapaminsar man ang grupo nanday Boyet Parcon nga indi lang sila ang nagakabuhi kag magaagunto, dapat lantawon kon ano ang angay kag nagakabagay para sa tanan. Kon sila ang nagakaipit sa sirkumstansya, sa pumuluyo sila nagapaapin. Ang pumuluyo kag gobyerno ang magapanagang sa ila pahabyog nga katuyoan./

Newspapers in Tagalog

Newspapers from Philippines

© PressReader. All rights reserved.