OWWA-6 mahatag bulig-pinansyal sa pamilya Demafelis

Hublas nga Kamatuoran - - Unang Pahina - Ni Ime SORNITO PB

Syudad sang ILOILO – Natalana nga maghatag sang bulig- pinansyal ang Overseas Workers Welfare Administration ( OWWA) 6 sa pamilya sang Ilongga nga nagobra bilang overseas Filipino worker ( OFW) sa Kuwait nga nasapwan patay sa sulod sang freezer. Sa interbyu sang mga katapo sang media kahapon kay Jack Arroyo, case investigator sang OWWA-6, naka-istorya na sila sa pamilya ni Joanna Daniela Demafelis sa Sitio Cordero, Barangay Ferraris, Sara, Iloilo kon sa diin nagpasalig sila nga mahatag sang burial assistance nga P20,000; insurance benefit nga P20,000; subongman livelihood assistance nga P20,000. Luwas diri, ginpasalig man ni Arroyo nga mabulig sila para mapapuli sa Sara ang bangkay ni Demafelis. “Subong ato to ang bangkay sa Kuwait. Siguro legal assistance lang anay para kon kinahanglan nila mag- file sang kaso may kwarta sila. Ikaduha amo ang pagpauli. So, dira lang anay kami nagafocus,” hambal ni Arroyo. Pero indi pa makahatag sang petsa kon san-o gid madala sa Pilipinas ukon sa Iloilo ang bangkay ni Demafelis bangod nga padayun pa ang pag-imbestigar sang mga otoridad sa Kuwait angut sa natabu kag para makasohan man ang posible mga amo sini nga mag-asawa nga Lebanese kag Syrian nga ginapasuni naghimu sang krimen. Naggwa man sa pagusisa sang OWWA-6 nga nagsugod ang duha ka tuig nga kontrata sang biktima bilang OFW sa Kuwait sadtong Mayo 18, 2014 nga magalawig tubtob Mayo 18, 2016. Sadtong Nobyimbre 26, 2016, nagbiya na ang mga amo sini sa Kuwait. Nahibaluan pa nga duha ka adlaw antes sila nagbiya sa Kuwait, nagdangop pa sila sa mga otoridad nga nadula si Demafelis. Magluwas naman sa OWWA- 6, nagabulig man ang embahada sang Pilipinas kag ang Department of Foreign Affairs para mapadasig ang pagpapuli sa bangkay ni Demafelis. Abagahon man sang Office of the Undersecretary for Migrant and Workers Affairs ang gasto sa pagdala sang bangkay sang OFW sa Pilipinas kon matapos na ang pagproseso sang papeles sini./

NAKIGKITA kahapon ang amay ni Joana Daniela Demafiles nga si Crisanto Demafiles upod ang iya utod kanday Department of Labor and Employment (DOLE) 6 OIC Wilfreda L. Misterio, Overseas Workers Welfare Administration 6 director sa opisina sang DOLE 6 sa Commision Civil Street, Jaro, Syudad sang Iloilo. (Laragway ni Ian Paul Cordero)/PB

Newspapers in Tagalog

Newspapers from Philippines

© PressReader. All rights reserved.