Soulmate Mo Ba Ang Iyong Sweetheart?
SINASABI ng mga psychics at mistiko na ang soulmate ay siyang kasama o kabiyak ng kaluluwa o lalong angkop sabihing kabiyak ng puso, o karelasyon na pinaguukulan ng pagtatangi at pagmamahal di lamang sa nakaraan at kasalukuyan kundi sa hinaharap. Ito’y itinakda ng tadhana o kapalaran, at ano man ang mangyari, ano mang pagsubok o hadlang ang darating, pilit na hinahawan, nilalabanan, inaalpasan dahil sa pag-ibig na nararamdaman.
Sa aklat ng mag-asawang Mark at Elizabeth Prophet na pinamagatang “The Lost Teachings of Jesus,” at ng aklat na isinulat ni Mark Victor Hansen na “Miracles in You,” ang soulmate ay kasasalaminan ng tinatawag na ‘twin flame relationship’ sa pagitan ng dalawang nilalang na nagmamahalan nang tapat, masidhi at walang kamatayan. Ito’y di kayang sirain o igupo ng mga panahon, ng mga pangyayari at pagsubok.
Madalas na itanong ng aming mga estudyante sa kolehiyo kung paano makikilala ang kanilang soulmates. Darating at makikita ba nila sa kanilang buhay sa kanilang sariling panahon? Na sasagutin namin na ayon sa mga eksperto sa larangan ng soulmate, karma at reincarnation, tiyak na pagtatagpuin sila ng pagkakataon, sa takda o itinakdang panahon.
Kung makikita mo ang iyong soulmate sa unang pagkakataon pa lamang, napakalakas at napakatindi ang kanyang dating. Ibig sabihin, titibok ang iyong puso nang gayon na lamang at mararamdaman mong ito na ang hinihintay mong pag-aalayan mo ng pag-ibig at pagmamahal. Na ibig mong maging lifetime partner, na magiging kasama at katuwang mo sa hirap at ginhawa, ng saya at lungkot, ng tagumpay at kasawian. At kung papaghiwalayin kayo ng kamatayan, at may buhay sa kabilang buhay, sa ibang daigdig, siya pa rin ang nais mong makasama sa buhay na walang hanggan!
Ang kagyat na mararamdaman mo pag nakita mo siya’y iyong “love at first sight” na sinasabi ng marami. Bukod dito’y mararamdaman mo ring tila matagal na kayong magkakilala, malapit ang loob ninyo sa isa’t isa. Tila nagkita na kayo noon, sa isang pook, sa isang panahon, di man ninyo tukoy, sa kaibuturan ng inyong puso’t isipa’y nakaukit iyon sa nahihimbing na alaala. Kagyat man, mutual ang feelings ninyo sa isa’t isa.
Ang siste, bagama’t itinakda ng tadhana, kung minsan, dumarating iyon sa tila di tama, at maling panahon. Nang magtagpo kayo, di na kayo malaya. May kasintahan o mayasawa na ang isa sa inyo o kaya nama’y kapuwa kayo may pananagutan na sa buhay. Bakit ngayon lang?
Ayon sa mga eksperto, tulad nina Sylvia Browne ng Amerika at ni Jaime Licauco ng Pilipinas, bahagi iyon ng karma na dapat ninyong pagdaanan. Ang karma’y alinsunod sa prinsipyo o kasabihang “kung anong itinanim, siyang aanihin.” Kung kayo’y naniniwala sa reincarnation, ang muli’t muling pagkabuhay ng isang nilalang, maaaring sa mga nakaraang inkarnasyon, may mga pagkukulang o kasalanan kang nagawa na dapat mong pagbayaran o pagdusahan sa kasalukuyan at sa hinaharap. Hindi iyon maiiwasan o matatakbuhan. Susundan at susundan ka ng iyong ginawang kamalian o kasamaan.
Isang nagdudumilat na katotohanan na karamihan daw sa mga mag- asawa’y di mag-soulmates. Ang pakikipagrelasyon sa di ka-soulmate ay mga intervening incidents kung saan iwowork-out nila ang kanilang sariling karma upang unti-unting maiwasto ang kanilang kamalian sa mga nakaraang panahon. Ito’y tinatawag na “evolment”, o paglinang/pagbabago ng katauhan nang naaayon sa hinihingi ng pagkakataon.
A, walang makakapigil sa pag-iibigan o pagsasamahan ng mag-soulmate sukdulang hihiwalayan nila ang kanilang karelasyon sa kasalukuyan. Sukdulang may lalabagin silang batas ng lipunan o batas ng kagandahang asal o ng pakikipagkapuwa-tao. Wala silang pakialam kung magalit o mamuhi man sa kanila ang buong daigdig, ang importante’y magsasama sila sa taong kanilang minamahal, mula’t sapul.
Para sa kanila, ang pagmamahalan nila’y nakaguhit na sa kanilang kapalaran. Ito’y nakatakda nang mangyari, gustuhin man nila o hindi. Aplikado rito ang kasabihang “Ang pinagsama o pinagbuklod ng Diyos, ay di dapat paghiwalayin ng tao. “Sila iyong katuparan ng isa pang kasabihang “Love is forever,” tama? Ang buklod ng mga taong gustong magsama’y pag-ibig, di nga ba?
Sa mga mistiko, ang pag-iibigan ng mga mag-soulmate ay binalangkas na ng mga nakaraang panahon. Ano man ang mangyari sa kanilang buhay, ang pagsingit/pagsulpot ng mga batian-hiwalayan, hiwalayan-batian blues sa kanilang buhay, ng mga paghihirap at pagdurusa, ng mga pagsubok at paghamong daranasin, sila pa rin sa bandang huli. Ang pag-ibig na bukal sa puso, ay isang immortal na bagay at kinalulugdan ng Panginoong Diyos!