Mga basurahan ibutang sa matag tugkaran: DENR
NIAWHAG ang Department of Environment and Natural Resources (DENR) sa mga lokal nga kagamhanan ug mga pribadong establishemento sa Sugbo nga magbutang og mga basurahan sa ilang tagsa tagsa ka tugkaran aron di magkatag ang mga basura sa kadalanan.
Nunot kini sa pagdagsa sa minilyon ka mga deboto ug dumuduong nga ningduyog sa mga Sugbuanon sa kapistahan ni Sr. Sto. Niño labi na karong adlawa atol sa Sinulog grand parade.
“The feast of the Santo Niño is a well-cherished and treasured tradition among the Cebuanos as it has also become an occasion for reunion of families and friends, but we should do away some practices that would harm the environment and our health,” nagkanayon si DENR 7 Regional Executive Director Dr. Isabelo Montejo.
Siya niingon pinaagi sa mga basurahan alang sa malata, di malata ug recyclable nga mga basura sa strategic nga mga lugar, sayon na lang unya ang pagkolekta niini sa mga basurero.
Ang siyudad sa Sugbo gibanabana nga makakolekta og basura nga moabot ngadto sa 511 tons matag adlaw o 0.7 kilos matag usa ka tawo matag adlaw sa ordinaryo lang nga adlaw.
“You could just imagine the magnitude or volume of the garbage that will be generated for this occasion that we love to celebrate annually,” matod ni Montejo.
Ang opisyal niawhag sa publiko nga maghimo og inisyatiba sa pagpanalipod sa kalikupan samtang nag- enjoy sa selebrasyon pinaagi sa pagdala og kaugalingong trash bags alang sa malata ug di malata nga basura; magdala og igo lang nga pagkaon ug ilimnon sama sa tubig, juice ug softdrinks nga ibutang og recyclable containers ug dad-on pagbalik sa balay ang sobra nga mga pagkaon aron mainit.
“In this manner, the shelf life of a sanitary landfill could extend and lengthen,” pahayag niini.
Siya nidugang kon pasagdan ang mga basura nga magkatag sa kadalanan, kuyaw kini mobara sa mga estero o kasapaan nga magdala og karisgo sa panglawas sa mga tawo o sa palibot nga komunidad.
Sa miaging tuig nga selebrasyon sa Sinulog, niabot og 100 tons ang nakolekta nga basura sa siyudad sa Sugbo.