Radaza mopatuman sa plastic ban sa Lapu-Lapu

BUOT ni Lapu-Lapu City Mayor Paz Radaza nga ipatuman na usab sa dakbayan sa Lapu-Lapu ang plastic ban sa di madugay.

Apan di susama sa dakbayan sa Mandaue, kini ipatuman lang sud sa duha ka adlaw matag semana.

Kini maoy gipahibaw sa mayor atol sa press conference sayo ning semanaha.

Human sa kusog nga pagbaha sa Mandaue niadtong Hulyo 1 tungod sa pag-uwan-uwan, gipahugtan ni Mayor Luigi Quisumbing ang implementasyon sa plastic ban sa dakbayan.

Apan di sumama sa Mandaue nga tibuok semana ang pagpatuman sa pagdili sa paggamit sa plastik, matod ni Radaza nga buot niyang ipatuman kini sa Lapu-Lapu matag Biyernes ug Sabado lang.

Sumala sa mayor nga human iduso sa konseho ang maong tahas, ipaagi kini og public hearing.

Matod ni Radaza, tuyo sa public hearing mao nga aron magdala na ug mga kaugalingong sudlanan ug mga recyclable bags ang mga konsumedor nga mangumpra sa mga tindahan, sa merkado ug uban pa.

“Magda na mo’g basket. Magda gyud og Tupperware kung isda kay di ba kaniadto magbasket man. Wa may isda,” awhag sa mayor.

Padayag niya nga makahatag ug peligro ang plastilk ilabi na kung di kini ilabay ug tarong sa saktong labayanan tungod kay makabara kini sa mga agianan ug tubig sama sa kanal nga moresulta sa pagbaha kon mobunok ang kusog nga uwan.

“We don’t have to see it nga mobara na ug mag-flood usa pa. Atong gitan-aw na lang daan ang future,” dugang ni Radaza.