5 lalake nadakpan

ORMOC CITY Lima ka lalake ang nadakpan sa gihimong joint Anti-Illegal Drug Operation sa Albuera PNP ug Regional Public Safety Battalion (RPSB) 8 sa Sitio Tinago, Barangay Benolho, Albuera Leyte.

Ang lima giila nga sila si Marcelo Adorco, Jessie Ocartes, Jose Antipuesto, Richard Pisquera ug Ernesto Dumalat.

Matod ni P/CInsp. Juvie Espenido, hepe sa Albuera PNP, nga mokabat sa 237.8 gramos ug dunay kantidad nga P1.9 milyones ang nakuha nga shabu.

Narekober usab sa kapulisan gikan kang Adorco ug Ocartes ang duha ka kalibre .45 Glock pistols ug mga bala niini.

Dunay lisensya ang mga pistola apan susihon pa sa kapulisan kun di ba kini peke. Nakakuha usab og paraphernalia ug salapi ang kapulisan.

Matod ni Espenido, pasado alas 5:00 sa hapon, napalitan og shabu si Antipuesto busa gilusad ang operasyon.

May nahitabo nga ginukdanay human misuway pagikyas ang uban apan naabtan kini sa kapulisan apan dunay uban nga wa maabti.

Gihimakak sa mga dinakpan nga ilaha ang nakuha nga shabu apan matod ni Espenido sa korte nalang moeksplikar ang lima.