Kidlat Cepca king

NAGHARI si Jun Kidlat sa Agusto nga edisyon sa Group B sa Cebu Executives and Professionals Chess Association (CEPCA) Monthly Qualifying Tournament niadtong Dominggo sa Robinson’s Galleria Cebu.

Pagkahuman sa 5-round Swiss System nga torneyo, nahilambigit si Kidlat sa three-way tie sa ibabaw nga luna dala ang 4.0 puntos kauban sila si Cepca president Engr. Jerry Maratas ug Manuel Abucay.

Hinuon pinaagi sa tiebreak basi sa patakaran, si Kidlat, kinsa nanag-iya og car rental company sa Sangi, Lapu-lapu City, maoy mipatigbabaw diin nakakuha siya og 16.0 tiebreak points.

Si Maratas naa sa ikaduha nga adunay 14.5 TP samtang ikatulo si Abucay, kinsa igo lang nakatigom og 13.5 TP.

Gipanglupig ni Kidlat sa nagunang duha ka rounds sila si Joe Atillo ug Abucay (rd2) apan gilupig siya ni Maratas sa 3rd round.

Mibawi si Kidlat sa kapildihan gikan kang Maratas ug namungot sa nagsunod duha ka rounds batok nila ni Ruel Hortelano ug KC Morala, kinsa usa ka lady varsity player sa University of San Carlos (USC).

Miabot ngadto sa 18 ka mga magduduwa ang nagpinugaay og singot sa utok sa Group B.

Ang mga nag-organisar nakadesisyon nga humanon og sayo ang qualifying events sa Group A gumikan sa ka kuwang sa mga partisipante.

Ang mga naka- qualify nang daan sa Group A maghuwat na lang sa grand finals nga ipahigayon karong Disyembre.

Ang Group A qualifiers mao sila si Rogelio Enriquez Jr., Amado Olea, Arnold Cadiz, Rosendo Yamyamin, Peterson Sia, Jojo Muralla ug Carlo Maraat.

Samtang sa Group B, ang mga qualifiers mao sila si Bong San Pascual, Romy Pialan, Percival Fiel, Jerry Maratas, Ruel Hortelano, Mario Bustillo, Richard Ouano ug Jun Kidlat.