72 magtiayon nagpakasal sa Naga
MOKABAT sa 72 ka mga parisan ang dungan nga nagpakasal kagahapon sa dakbayan sa Naga, diin si Bise Gobernador Agnes Magpale ug mga opisyal sa Kapitolyo maoy nagsilbing sponsors sa mass wedding.
Kini maoy ika-unom nang mass wedding nga gipahigayon sa dakbayan sa Naga, apan una pa kini sa administrasyon ni Mayor Kristine Chiong.
Ang kalihukan gisugdan alas 9:00 kagahapon sa buntag sa Archdiocesan Shrine of St. Francis of Assisi, diin ang 72 ka mga parisan gikan sa 28 ka mga barangay sa Naga ug tipik sa ilang kalihukan sa ilang charter day.
Si Chiong niingon nga igo lang niyang gisunod ang programa sa iyang amahan nga si kanhi Mayor Valdemar Chiong tungod kay iyang nakita ang kamahinungdanon sa kaminyuon.
Matod sa mayor nga kaniadto daghan ang parisan sa mga magpakasal nga miabot gani og 280 niadtong 2012, apan nagdagan ang tuig, nagkagamay.
Posebling niminus na usab ang mga nag-ipon tungod sa ilang libreng kasal.
Nagkanayon si Chiong nga way gasto ang mga magpakasal tungod kay mismo sa kaon gasto sa siyudad hangtod sa ilang tagsa-tagsa ka cake.
Ang labing batan-on nga gikasal mao si Michelle Bacarro, 18, ug Carlo Caday, 26.
Matod ni Michelle niingon nga upat na sila ka buwan nga nag-ipon ni Caday.
Human nila masayri nga adunay libreng kasal ila gilayon kining gipahimuslan.
Ang bag-ong magtiayon mipadayag sa ilang pasalamat kang Chiong nga nilusad sa programa.
Samtang ang labing edaran nga gikasal mao ang managtiayong Apolonio ug Venita Lakang-Lakang, pulos 54 anyos ang panuigon.
Sila niingon nga una na silang gikasal sa civil ug aduna na silay upat ka anak ug walo ka apo.
Nagkanayon si Venita nga damgo niya nga makasal sa simbahan hinungdan nga nagpasalamat siya sa kagamhanan sa Naga nga mihimo sa mass wedding.
Gawas ni Magpale mitambong usab ang first lady sa Kapitolyo mao si Jobella Davide.
Wala makatunga si Kongresista Samsam Gullas samtang diha usab ang mayor.