Tangtangan og police power
DUNAY balaodnon nga gipasaka karon si Senador Panfilo Lacson nga kon mapasar sa kongreso hingpit nga mawad-an ang mayor o governor og police power o gahom sa pag- supervise sa mga tinugyanan sa balaod.
Dili na unya usab sila makabuot kon kinsa ang ilang gusto nga himuong hepe sa ilang lungsod o probinsiya.
Nag-unang katuyoan sa Senate Bill 971 mao nga dili maduhigan og pamulitika ang Philippine National Police (PNP). Hinuon kining maong balaodnon nagtugot sa gobernador sa pag-implementar sa kahapsay ug kasiguroan sa publiko.
Sa ato pa, ang provincial district police directors mao nay mopili kon kinsa ang ilang ibutang nga hepe sa matag syudad o lungsod.
Ang PNP Senior Officers Placement and Promotion Board mao usab ang motudlo kon si kinsa ang ibutang nga mga provincial district police.
Sa kasamtangang balaod gud, ang mayor ug governor gikonsiderar nga maoy deputized representatives sa National Police Commission sa ilang hurisdiksiyon.
Mao nga gitugotan sila nga makapili kon kinsa ang ilang gustong himuon nga hepe.
Pero dili nato ikasalikway nga daghang mga mayor ug gobernador ang miabuso sa ilang police power.
Sagad kanila migamit sa mga pulis alang sa ilang kaugalingong political interest.
Duna man gani mga pulis nga gihimong collector sa pipila ka mga mayor sa mga kuwarta nga gikan sa ilegal nga mga negusyo, apil na niini ang payola sa mga tigpayuhot sa gidiling drugas.
Hinaot nga mapasar kining balaodnon ni Lacson sa madaling higayon kay labing siguro mao ni usa ka paagi nga ma- professionalized ug matarong pagbalik ang nagusbat nga imahe sa kapulisan.