Rakista
WALA koy mahinumdomang rason nganong rock music ang akong gipiling behikulo sa akong mga kanta sa pagtukod namo sa bandang Missing Filemon. Dili to sama anang moingon ka, “Magtukod kog banda, ug kinahanglang rock gyod among music.”
Naghunahuna ko ani kay nagtubo ko sa klase-klaseng musika sulod ug gawas sa balay. Nagtubo ko sa disco (Bee Gees, Abba, VST & Co.), standard (Paul Anka, Perry Como, Frank Sinatra), OPM (Apo Hiking Society, Rey Valera, Rico Puno), Bisaya novelty (Yoyoy Villame, Max Surban) ug folk (Jim Croce, James Taylor, Simon & Garfunkel, Asin), ug uban pa.
Naminaw na ko kaniadto sa mga nga bagsik nga rock bands, sama sa The Beatles ug Led Zeppelin, apan ang akong pagdayeg nila wala milabaw sa akong pagdayeg sa uban. Susama ra ang akong pagdayeg nilang tanan.
Milabaw ang akong hilig sa rock music niadtong panahon nga gubot akong hunahuna ug wa ko kahibawo unsay buhaton sa akong kinabuhi. Ambot unsay tinuod: gubot akong kinabuhi mao nga midagan ko sa rock music, o nahigugma ko pag-ayo sa rock music mao nga nagubot akong kinabuhi.
Ang soundtrack sa akong kinabuhi aning panahona mao ang mga rock band nga Eraserheads, Yano, Siakol, Oasis ug Nirvana.
Matod pa sa akong nabasahan, ang rock music kuno “is often seen as an expression of youth revolt against conformity and the establishment.” Ang rock music kuno usa ka pagrebelde sa mga batan-on batok sa mga gamhanan ug sa mga naandan.
Ug kay pagrebelde man, naa diha ang kasuko, kahiubos ug kalibog sa mga butang sa palibot. Sila nga wa kasabot sa kaugalingon, ipaagi lang sa kahubog.
Tinuod tingali ni kay tan-awa lang gud nang mga rock concerts, ambak diri, layat didto, syagit diri, singgit didto, yarok diri, tagay didto. Ug kon magkalisod, naa gyoy madisgrasya.
Pipila na sab ka higayon nga undangon sa organizers ang among tukar kaniadto kay di na mapugngan ang mga tawo. Naay mokatkat sa stage aron maglayat-layat, naay mangilog og microphone, naay mangilog og tagay, naay maligo sa beer ug maglangoy-langoy sa ilang suka.
Mas ganahan mi motukar nga ingon ani ang crowd. Kasagaran ni mahitabo sa mga gigs namo sa mga syudad ug sa mga kalungsoran sa may norte nga bahin sa Sugbo.
Ambot unsay naa sa mga taga salot nga mora man gyod ni silag giugbok sa ilang lingkoranan kon manukar mi. Kana bitawng motukar mi sa Pinamungajan, sa akong lungsod nga natawhan mismo, labihan na man lang gyong puyoa sa mga tawo, morag namatyan. Nalipay ba kaha intawon ni sila sa akong gibuhat?
Pero sige lang. Nagpasabot tingali ni nga dili gubot og kinabuhi ang mga batan-on didto ug dili rebelde ang ilang panghunahuna, mao nga di sila rakista. Ingnon ta lang punga.