Jail officer sa Danao gipusil, patay
JAIL officer namatay human gi- ambush sa duha ka mga lalakeng nagmotorsiklo kagahapon sa alas 7:20 sa buntag sa Barangay Guinsay, dakbayan sa Danao.
Si JO2 Celso Montalba, 48, minyo, taga Barangay Sabang, dakbayan sa Danao, sakop sa Bureau of Jail Management and Penology (BJMP) sa Danao City namatay sa mga samad pinusilan sa kalawasan.
Si Sr. Insp. Alejandro Batobalonos, hepe sa Danao City Police Station nga nahinabi sa Superbalita Cebu, nihulagway kang Montalba nga high value target sa ilang drugs watchlist.
Si Batobalonos niingon nga si Montalba gikan naghatod sa iyang anak sa eskwelahan dihang giatangan sa duha ka killers sa Barangay Guinsay samtang nagmotorsiklo.
Gipusil si Montalba sa makadaghang mga higayon nga wan a makahigayon pag-eskapo tungod sa kakalit.
Dihang natumba, giduol siya sa usa sa mga killer ug gibinlan og paskin nga nakasuwat ang “BJMP pusher ko, ayaw ko ninyo sunda ikaw sunod.”
Sa pagsusi sa mga imbestigador sa lawas ni Montalba, ilang nakuha gikan sa bulsa ang usa ka dakong putos sa bulto sa shabu nga nitimbang og 10.5 gramos nga mobalor og P125,540.
Si Batobalonos nibutyag nga si Montalba gibutang nila nga high value target sa ilang listahan human sa dugay na nilang monitoring ug nakompirmar nga may kalambigitan sa ginadiling drugas.
Posibling dunay gikasabot si Montalba nga hagbu- ngan sa ginadiling drugas sanglit sayo pa kaayo gikan naghatod sa iyang anak diin wa mag-uniporme.
Ila pang ipahiling ang cell phone apan nagduda sila nga may posibilidad nga may gika- transact apan giatangan na siya sa mga killer.
Drugas maoy motibo nga ila karong gisubay sa kamatayon ni Montalba, kinsa dugay na usab nga gibadlong sa ilang warden nga moundang na sa illegal nga kalihukan.