SCADA system gidawat sa MCWD gikan sa JICA
WA magtuo si Metro Cebu Water District (MCWD) board chairman Rene Mercado nga ang iyang komedya ngadto sa usa ka Japanese official sa usa ka panihapon pipila ka mga tuig ang nakalabay mahimong tinuod ug mapuslan og maayo sa water firm.
Kagahapon, pormal nang gitugyan ug gisubhan sa Japanese government pinaagi sa Japan International Cooperation Agency (JICA) ngadto sa Metro Cebu Water District (MCWD) ang P679 milyones nga Supervisory Control and Data Acquisition (SCADA) system.
Kini magpasayon sa kompaniya sa pag-monitor sa ilang mga tubo ug tinubdan sa tubig.
Ang SCADA teknolohiya nga dunay kapasidad sa pagtino kon asa ug unsay problema sa koneksyon sa ilang tubo, gidaghanon sa tubig nga mapagawas sa bomba.
Gawas niini, mahibaw-an ang gidaghanon sa tubig sa reservoir, asang lugar ang adunay hinay nga pressure sa tubig, leaking kun nabuslot nga bahin ug uban pa.
Si Mercado niingon nga posibling kapin tunga sa bilyon nga proyekto pinaagi sa grant sa JICA.