Slam dunk, 3-pt. shootout way defending champion

ADUNAY parehas nga poruhan ang mga partisipante sa Three-Point Shootout ug Slamdunk Contest karong tuiga sa CESAFI gumikan kay wala’y defending champions nga modepensa sa ilang titulo.

Ang mga kalihukan nagsilbeng lamas sa CESAFI All-Star Games nga ipahigayon ugma sa Cebu Coliseum.

Ang Three-Point champion sa miaging tuig nga si Franz Arong sa University of the Visayas (UV) Green Lancers wala na gumikan kay nahurot na ang playing years niini sa liga.

Samtang ang Slamdunk King sa miaging tuig nga si Leonard Santillan, kinsa sakop sab sa Green Lancers, mibalhin na sa De La Salle University (DLSU) sa UAAP sa Manila. Sakop si Santillan sa Team B sa Green Archers tungod sa residency period.

Ning tuiga, ang mga partisipante sa Three-Point Shootout mao sila si Shaquille Imperial ug two-time MVP Mark Jayven Tallo (SWU), Jaybie Mantilla ug Ralph Dinolan sa USJR Jaguars, Ian Tagapan, Kevi Oleodo ug Victor Rabat USC Warriors.

Naa sab sila si Josue Segumpan, Tristan Albina ug Jerome Napao sa UV, Roy Quiachon ug Wisdom Ceniza (USPF), Garciano Puerto ug Justine Dacalos (UC), Steven Bucao ug Marlo Pono (CITU).

Ang nangahisgutan pulos adunay kapabilidad nga molangkat sa titulo.

Sa Slamdunk Contest, ang mga partisipante mao sila si Conrad Catapusan (USC), Garciano Puerto (UC), Juan Miguel Gastador (USJR), Rodelio Cauba (USPF) ug Rey Suerte (UV).