5 BIGTIME DRUG PUSHERS SIKOP
Dul-an sa P1M shabu ang nasakmit sa 2 ka ronda sa dakbayan sa Sugbo
LIMA ka sakop sa bigtime nga sindikato sa gidiling drugas sa Sugbo ug Central Visayas ang gipusasan human sa duha ka sunodsunod nga pagpangronda sa kapulisan.
Nakuha ang dulan sa P1 milyon nga kantidad sa gidiling drugas sa managlahing operasyon kagahapon ug niadtong Sabado sa dakbayan sa Sugbo.
Si Jerry Tan Lim, 44, trabahante sa BAJ Company, maoy subject sa search warrant human siya nagpadagan sa usa ka drug den diha sa ilang lugar, samtang nasikop ang iyang igagaw nga si Mark Ang Lim, 42, managsuong negsoyante'g laundry shop nga sila si Fernando Calderon Go, 46; ug Alexander Caldero Go, 52.
Ang mga suspek nasikop sa joint operations sa mga sakop sa Regional Anti-Illegal Drugs Special Operations Task Group (RAIDSOTG) 7 pinanguluhan ni Supt. Joel Quintero, Regional Special Operations Group (RSOG) 7, Philippine Drugs Enforcement Agency (PDEA) 7 ug City Intelligence Branch (CIB) sa Cebu City Police Office pinasikad sa search warrant nga giisyu ni Judge Jerry Dicdican, sa Regional Trial Court (RTC25) sa dakbayan sa Danao.
Ang joint operation team nakasakmit sa usa ka dakong bulto sa shabu, laing 4 ka bultong shabu, daghang mga drugs paraphernalia, syringe ug uban pa nga motimbang sa 70 gramos ug mobalor sa P826,000 base a Dangerous Drugs Board value.
Si Chief Insp. Dexter Calagar, public information officer sa Police Regional Office7 nga nahinabi sa Sun.Star
Superbalita nagkanayon nga kapin sa usa ka semana nilang gimonitor si Jerry Lim, human nahibawan nila nga nagpadagag drug den sa dapit.
Apan dihang gipatuman nila ang search warrant nasurprisa sila human sa kadaghang kunsabo niini ug sa kadaghan sa drugas nga nakuha.
“Dako ni nga sindikato sa drugas pero sa pagkakaron ato ni silang gisubay kon asa gikan ang tinubdan ingon man asa sila nakalinya nga grupo,” dugang ni Calagar.
Gipadayag niini nga si Lim, taudtaod na nga nakapadagan sa mao nga drug den, apan luyo sa tanan usa diay kini ka dakong durugista dinhi sa Sugbu.
Giklaro niini nga si Lim, wala malakip sa ilang watch list sa PRO7 kay bago lang kini nilang nahibawan unya usa ka drug den ang gipadagan sa ilang nakuhang impormasyon.
Sumala pa niya nga kon mapaubos na unya nila sa mas lawom nga imbestigasyon mahibawan unya nila kon asa kini nga grupo sa mga bigtime time drugs pusher dinhi sa Central Visayas.
Nagtuo sila nga duna pay daghang ka kunsabo si Lim, ug mga bigtime ang grupo niini ilabi na kay pwerting daghana sa drugas ang nakuha sa ilang possession unya wala sila malakip sa top 10 o listahan.
Samtang gisubay sab nila karon ang dugang background sa mga kauban niini nga nangadakpan, sanglit nagtuo sila nga plantalya lang ang mga negosyo niini.
Kagahapon usab nasikop ang giingon nga miyembro sa sindikato sa Central Visayas nga anaa sa ilang priority target list ang nasikop sa operatiba sa PDEA 7 sa dan A. Lopez, Barangay Calamba dakbayan sa Sugbo.
Ang mao nga buybust operation gihimo sa maong ahensiya inubanan sa RAIDSOTG 7, ug RSOG 7.
Ang nasikop mao si Rosalia Villanueva Arabis, alyas Saling, 55, kinsa residente ra usab sa naasoy nga dapit.
Matod ni Leia Albiar, ang tigpamaba sa PDEA 7, nga aduna'y negosyo si Arabis nga lechonan ug maninda usab kini og karne sa A. Lopez.
Atol sa ilang operasyon alas 8:30 sa buntag kagahapon, gipalitan kini nila og P500 nga kantidad sa shabu.
Diha mismo sa tindahan ni Arabis kini napusasan.
Si Arabis, duha ka semana nga gipanidan sa maong ahensiya nga makadispose og 50 ngadto sa 100 nga gramos sa ilegal nga drugas matag semana.
Nasayran usab nga siya mao ang tigsupplysa tibuok Labangon ug Calamba.
Padayon gisuta sa PDEA 7 ang mga dapit nga baligyaan ni Arabis sa ilegal nga drugas ug kinsa ang magkuhaan niya.
Dinagkoay ang negosyo niini sa ilegal nga drugas human nasuta nga aduna kini'y koneksiyon sa dagkong grupo nga nagoperate og ilegal nga drugas sa rehiyon.
Dugang ni Albiar nga aduna na'y gisaysay kanila ang maong suspek kon diin siya magkuhaan sa iyang drugas apan dili usa kini nila ibutyag sa publiko.
Lakip sa nasakmit kang Arabis ang lima ka gramos nga shabu nga aduna'y DDB value nga P59,000.