Estudyante giduslak sa laing tinun-an
(Napatik sa Superbalita Davao, Oktubre 21, 2016)
USA ka grade 6 pupil ang namatay human giduslak sa iyang kontra nga grade 5 pupil alas 11 pasado sa buntag niadtong Huwebes, Oktubre 20 didto sa gawas sa Francisco Bangoy Elementary School sa Barangay Sasa, dakbayan sa Davao.
Ang biktima giila nga si John Mark Olareta, 13, nagpuyo sa Parola, Barangay Sasa, ning dakbayan.
Sa gihimong pagpanubay sa SunStar Davao Superbalita sa Women and Protection Desk sa Sasa Police Station, ang imbestigador (naghangyo di isuwat ang pangalan tungod sa protocol), nagsulti nga ang biktima namatay human giduslak iyang ulo sa hait nga kutsilyo.
Nasayran nga dihang migawas na ang biktima sa ilang tunghaan, kalit siyang giduol sa manag-agaw nga suspek dayon gidunggab.
Ang biktima daling gidala sa Southern Philippines Medical Center (SPMC), apan namatay siya sa tambalanan.
“Ang 16-year old suspect lang ang midunggab, while ang 13- year old maoy lookout,” sulti sa imbestigador dihang nahinabi niadtong Huwebes, Oktubre 20. Dihang gipangutana kon tinuod ang miguwa nga balita nga karibal sa gang ang biktima ug mga suspek, siya nagsulti: “Wa man silay gang. Naa lang silay personal grudge kay niadtong Miyerkules nagkasi num bagay sila mao to nga nausban kaganina.” Niadtong Huwebes, samtang gihinabi ang imbestigador, ila nang gikustodiya ang mga minor de edad samtang ang biktima gihaya sa lokal nga punerarya. Ang 16-anyos nga suspek gitakda nga pasakaan og kasong murder sa kapulisan niadtong Biyernes, Oktobre 21.