Magsuon nagpinatyanay

(Napatik sa Superbalita CDO, Oktubre 21, 2016)

DUNGAN og kamatay ang duha ka magsuon dihang nagpinatyanay niaging adlaw didto sa Barangay Eureka, dakbayan sa Gingoog, Misamis Oriental.

Giila ang magsuon nga sila si Mansueto ug Rey Pabular, pulos hingkod ang edad ug mga residente sa dapit.

Sa imbestigasyon sa Gingoog City Police Station sa pagpangulo ni P/CInsp. Esperidion Biado II, nasuta nga daan na nagbikil ang magsuon gumikan kay gikaulit ni Rey ang giingong pagsuway og luba ni Mansueto sa ilang amahan kaniadto.

Giingong taod-taod na kining gidumtan sa igsuon hinungdan dihang lango sila sa ilimnong makahubog niadtong tungora mikuha og improvised shotgun si Rey ug gipusil si Mansueto apan wa kini diretso mapuruhi ug nakakuha pa kini og kutsilyo ug giluba si Rey makapila ka higayon hinungdan sab sa kamatayon niini.

Ang patayng lawas sa magsuon anaa na gihaya sa puloyanan sa mga biktima diin ang mga kabanay niini wa na mihatag og reaksyon.