Del Mar, VSMMC may MOA sa ospital
NAGPINIRMAHAY sa memorandum of agreement (MOA) silang si Kongresista Raul del Mar sa Cebu City north district ug Dr. Gerardo Aquino sa Vicente Sotto Memorial Medical Center (VSMMC) aron pakusgan ang serbisyong medical sa Guba District hospital (GDH) nga gipanag-iya sa Cebu City Government.
Si Del Mar kinsa maoy representante sa 44 ka barangay sa amihanang distrito sa siyudad ngadto sa Kongreso diin nahimutang ang GDH nagkanayon nga dako kini og ikatabang sa medical service sa 12 ka barangay iyang distrito nga adunay 50,000 ka populasyon.
Si Aquino kinsa maoy medical director sa VSMMC nagkanayon nga base sa ilang gikasabutan, ang iyang gidumala nga tambalanan maoy mohatag sa manpower sama sa mga doctor gikan sa Department of Family Medicine aron maoy mohiling sa mga emergency cases ug sa out patient nga modangop sa GDH.
Matod ni del Mar nga dako og ikatabang ang presensiya sa mga personnel sa VSMMC sanglit di na kinahanglan nga modiretso sa North General Hospital ang mga pasyente nga nanginahanglan og dinaliang nga tabang diin iyang gihulagway nga mosubra pa sa 30 minutos ang pagbiyahe gikan sa Barangay Lusaran ug kasikbit nga barangay nga maoy labing layo nga lugar sa siyudad.
Si Mayor Tomas Osmeña nipaluyo sa lakang ni del Mar kinsa iyang kaalyado sa Bando Osmeña Pundok Kauswagan.
Matod pa ni Aquino nga nihangyo kaniya si Del Mar kon mahimo ba nga makapadala og doktor ang VSMMC ngadto sa Guba sanglit nagkuwang kini sa medical personnel.
Ang buhatan ni Del Mar maoy mangita og pundo alang sa pagpalit sa mga medical supplies o equipment aron mapakusgan ang serbisyo samtang ang VSMM maoy modumala sa out patient department services.
Iyang natan-aw nga maayo og katuyoan ang hangyo sa kongresista hinungdan nga nihimo sila og MOA diin niadto untang Disyembre 1 magsugod apan giangkon ni Aquino nga wa pa sila makapadala og personnel sa GDH hangtod sa pagsuwat ning balita.