Init nga gasa sa gugma
NAGKA-ANAM na ka bugnaw ang huyuhoy sa hangin, nagkidlap-kidlap na ang mga parol, suga ug lain-laing dekorasyon sulod ug gawas sa mga balay ug mga edipisyo. Puno na sab ang mga tindahan sa mga lain-laing makadani nga mga baligya nga nangamay sa mga mamalitay kay maihap na lang ang adlaw sa naghinangat nga Pasko ug Bag-ong Tuig.
Kada usa nato lain-lain ang estilo sa pagputos ug pagpanghatag og regalo. Dunay manghatag sa ilang mga butang nga dunay sentimental value nga tinaguan pa gikan sa daang kaban, duna say magbasi sa kantidad sa regalong paliton nga dili mo lapas sa ilang panudlanan. Ang uban sab kab-uton ang langit ug mangutang para mapalit ang gipangandoy nga gasa sa ilang minahal. Ug ang uban nga sama nako, mag-effort og luto (cakes, cookies, pickles), himo og kitchen garden, bonsai, ug mga lain-laing handicraft nga ginama sa akong kamot.
Tradisyon sa among banay ang “Manito ug Manita’ kada hinangat sa Pasko. Matag usa namo dunay ipasukip nga listahan sa among gustong madawat kon wish list nga maoy mo giya sa nakabunot sa among pangalan . Tungod ini, maghinam-hinam mi og handom sa gasa nga amo unyang madawat hangtod sa pag-abot sa bisperas sa Pasko.
Dili nako malimtan ang maanindot ug kataw-anan nga kasinatian dihang usa ka Pasko, ang akong inahan nagpadungog-dungog sa nakabunot sa iyang pangalan sa iyang gustong gasa nga madawat. Nagpalingog-lingog kunuhay akong anhing amahan nga siya ang nakabunot maong pag-abot sa panahon nga mag- exchanging gifts na, dili mahulagway pirmiro ang iyang dagway kay dako man kaayo ang karton sa regalo ang iyang nadawat, sukwahi sa iyang naibgan ug gipangandoy nga gasa.
Sa dihang nangalipay ug nagkabuang na mi tanan pagbukas sa among tagsa-tagsa ka mga gasa, nahibong siya kay gaan man kaayo ang regalo nga iyang nadawat. Sa iyang hinay-hinay ug kulba-hinam nga pag-abri, iyang nakita nga gisulod pa kini og mga daghang nagakob nga mga karton nga nagka-anam og ka gamay hangtod nga mura na lang kini og sudlanan sa posporo ang nahabilin.
Mitulo iyang luha kay sa katapusan niyang pagbukas sa pinakagamay nga putos, ang maanindot man nga gamay’ng regalo nga iyang gihandom, na-ibgan ug gibalikbalikan sa tindahan ang iyang nadawat. Gitimanan diay kini sa akong anhing amahan ang iyang nagustuhan ug gitago kini human napalit sa hilom.
Akong gipa-ambit kining tinuod nakong sugilanon kay matag karon ug unya maghatag man kini nako og sa akong mga kabanay og maanindot nga pagbati labi na ang hulagway sa tam-is nga pahiyom, init nga gasa sa gugma og hilak sa kalipay nga gipakita sa akong mga ginikanan atubangan namong mga anak.