I’ll be true to you
(Katapusan sa pito ka mga gula)
SA
akong kalagot kang Richard, gibiyaan ko siya sa among gikan-an. Sa akong paminaw gud niya, morag naglikay na siya nako.
Naguol gyud ko sa gipakitang kausaban sa tinagdan sa akong boyfriend nako.
Nanglabay ang mga adlaw, Wa na moteks si Richard nako. Labaw na nga wa siya motawag nako sa selpon. Hapit kada gabii maghilak ko sa hilom sa sulod sa akong kuwarto. Gisakitan gyud ko sa gibuhat ni Richar nako. Pero sa nadugay na, na- realize ko ang tanan. Kon wa na gyuy gugma si Richard nako, di ko sab ipamugos ang akong kaugalingon niya.
Usa ka hapon nga misuroy ko sa downtown kay gusto kong motan-aw og sine, nakahunong ko paglakaw sa sidewalk kay sa sulod sa usa ka fast food nakita ko si Richard nga naglingkod. Dunay pagkaon ug drinks sa iyang atubangan, sa ibabaw sa lamesa, pero morag wa kini matandog. Naghinuktok si Richard, ug namatikdan ko nga midaot siya.
Mihugo gyud ang iyang lawas. Inanay nga nawala ang kalagot ko niya. Maoy mipuli ang usa ka pagbati nga nagtukmod nako sa pagduol niya. Naluoy ko sa nakita ko sa akong boyfriend. Aw, boyfriend gihapon ang pag-ila ko niya kay wa man mi magbuwag.
“Chard.” Hinay ang akong tingog nga mikupot sa abaga sa akong trato. Diha ko sa iyang luyo ug wa siya makamatikod sa pagduol ko niya.
Normal lang ang ekspesyon sa nawong ni Richard dihang milingi siya nako. Unya mibalik na sab siya sa paghinuktok. Hinay kong milingkod sa iyang atbang. Wa ko makapugong sa akong kaugalingon. Gikuptan ko siya sa kamot. Kahilakon ko.
“Please, Chard, tell me kon unsa gyuy imong problema? Wa ka na bay gusto nako? Prangkahi ko. Bisag sakit pero dawaton ko ni kay mao man kahay imong kalipay. May laing girl ba?” Mitan-aw og dugay si Richard nako. “Ikaw ra ang akong love, Laura. God knows kon unsa ko ikaw kamahal.” “Pero nganong naglikay ka na man nako?” “Nagtuo ko nga nausab na ang imong pagbati nako kay nakahibawo ka man nga gay diay si Papa.”
“Nausab?” Mikatawa ko. “Di na mahitabo, uy, kay nagmatinud-anon ko nimo. Ikaw ra sab ang akong love. Nagtuo ka tingali nga naghunahuna ko nga maparehas ka sa imong Papa nga bayot?”
Mitando si Richard. Mikatawa kog kusog. Ning higayona, mikatawa na sab si Richard. Unya nanggawas mi sa kan-anan nga nagkuptanay sa kamot.
(KATAPUSAN)