Unsaon pagtambal ang hangover
ADUNA ka bay hangover human sa usa ka gabii nga paglipay-lipay ug sobrang paginom sa ilimnong makahubog kuyog ang mga barkada? Ang kasagaran nga mga sintomas sa hangover mao ang paglabad sa ulo, pagduka, pangliponglipong, pagsingot, ug kabalisa, apan kasagaran dili kini molungtad og sobra sa 24 oras.
Diay pipila ka mga paagi nga makatabang sa pagwagtang sa hangover: Pagkatulog - Ang labing maayong paagi aron mawagtang ang hangover mao ang pagkatulog. Hatagi ang imong lawas og igong oras nga gikinahanglan ini. Inom og tubig - Makadehydrate ang alcohol, busa importante ang pag-inom og tubig o fruit juice aron ma rehydrate ang lawas. Vitamin Supplements - Ang sobrang pag-inom makahurot sa mga kinahanglanon nga nutrina sa lawas, busa angay lang nga mag-inom og vitamins aron mahulipan kini.
Ehersisyo - Ang paglihoklihok ug pag-apil sa mga pisikal nga kalihokan makatabang sa pagsagobang sa pagkabalisa. Makatabang sab kini sa pagpaspas sa pagproseso sa metabolization sa alcohol nga mogawas pinaagi sa pagsingot.
Kaon og prutas sama sa saging ug kiwi, itlog, sabaw, gatas ug patatas. Ang gatas, patatas, saging, ug kiwi makatabang sa pagpuno sa nakuwang nga minerales ug electrolytes sa lawas, labi na ang calcium ug potassium nga mominos sa sobrang pag-inom.
Posibleng naay uban ini nga di moepekto nimo apan moepekto sa uban. Naa puy uban ini nga epektibo nimo apan dili epektibo sa uban. Pilia lang ang moepekto nimo.