AMAHAN GIPATAY.
Nagbuy-od ang lawas ni Wilson Batucan, 52, human pusila sa lalake nga nagmotorsiklo kagahapon sa alas 6 sa buntag sa sityo Latasan, Brgy. Cansaga, lungsod sa Consolacion.
Wa pa gani masulbad ang kamatayon sa iyang 7 anyos nga anak nga lalake niadtong Disyembre 2016, usa ka barangay tanod gipusil patay sa wa mailhing mamumuno kagahapon sa alas 6:00 sa buntag sa sitio Latasan, Brgy.Cansaga, lungsod sa Consolacion.
Si Wilson Batucan, 52, minyo, namatay diha-diha human nakaangkog samad pinusilan sa iyang ulo.
Usa ka wa mailhing gunman nga nagsakay sa XRM nga motorsiklo ang nipusil kang Batucan sa makadaghang mga higayon. Si Chief Insp. Roderick Gonzales, hepe sa Consolacion Police Station nga nahinabi sa Superbalita Cebu, nibutyag nga drugas ang motibo sa krimen.
Matod ni Gonzales nga aktibo si Batucan sa kampanya batok sa ginadiling drugas hinungdan nga di layo ang posiblidad nga dunay mga durugista nga naglagot kaniya.
Si Batucan nag- sideline sa pagpamasahero og habalhabal, gikan naghatod og pasahero dihang giatangan.
Si Batucan maoy amahan ni Saniño, kinsa naigo sa saag nga bala sa tiyan samtang naglingkod sud sa ilang barongbarong.
Ang target unta sa gunman nga nagmotorsiklo mao ang usa ka 17-anyos nga lalake, apan nakadagan ug nakatago.
Si Saniño nagtan-aw og telebisyon niadtong gabii sa Disyembre 3, 2016 uban ni Wilson ug Marilou dihang naigo siya sa saag nga bala.
Namatay siya dihang gibalhin ngadto sa Vicente Sotto Memorial Medical Center.
Dunay mga nakakita sa hitabo nga niingon nga samtang nagdagan ang target nga batan-ong lalake, ang gunman nagsige og pabuto sa iyang armas bisan dunay daghang mga tawo sa palibot nag nag-estambay ug nanagan.
Dunay mga taho nga bisan ang usa sa mga gunman nagtaptap, dunay nakaila kaniya tungod sa usa ka timailhan sa iyang lawas.
Ang krimen wa pa masulbad kay ang gunman nagtaptap usab sa mao nga hitabo.
Samtang, giisip nga number 2 drug pusher sa Consolacion nasikop sa kapulisan.
Wa makaipsot ang suspek nga si Jeric Abao Pepito, no. 2 sa listahan sa kapulisan.
Nasikop ang iyang mga kaubang sila si Jison Manatad, Jose Aldie Alone, Job Buenaflor, Vicente de Cruz, Geraldo Altura, Emelio Sacare, Franco Murillo ug Ermilo Cabatingan. /