Weatherweather lang

Matod pa sa pangulo sa Human Rights Task Force on Extrajudicial Killings, wa silay nakita nga indikasyon nga ang mga pagpamatay kalabot sa drugas sa nasod gipaluyohan sa kagamhanan. Ila nga namatud-an nga vigilantes ang naghimo sa mga pagpamatay. Unsay reaksyon sa simbahang Katoliko? Di sila motuo kay nagtuo sila nga dunay kalabutan ang kagamhanan sa nahitabong pagpamatay. Nindot seguro og ipagawas sa simbahang Katoliko ang ilang gibasehan sa ilang pagtuo aron masabtan sab sa mga tawo.

Daghan ang miangay sa plano sa Presidente nga di idayon ang piniliay sa mga opisyal sa barangay karong Oktubre. Samot nga daghan ang miangay nga pulihan ang mga naglingkod karon sa mga OIC nga pinili sa Presidente. Ngano man?

Dakong gasto ang piniliay sa mga kandidato, hasta sab sa mga politiko, sanglit nabatasan na man sa mga kandidato sa barangay nga mangayo og ayuda gikan sa mga politiko. Masuko og balibaran unya mobahad pa maoy hinungdan nga labad sa ulo sa mga politiko sa lungsod kon dunay piniliay sa barangay. Kon di idayon ang piniliay sa Oktubre, makaginhawa og luag ang mga politiko sanglit bag-o pa man ang piniliay sa miaging tuig.

Tungod sa kusog nga palit sa buto sa piniliay, dunay bug-at nga rason si Presidente Digong Duterte nga motudlo na lang sa mga OIC nga molingkod sa barangay. Nagduda ang Presidente nga gastohan lang sa kwarta sa drugas ang mga kandidato sa barangay aron modaog unya maoy mamunoan sa barangay. Og mahitabo kini, seguradong way mahimo ang Presidente sa iyang gubat batok sa drugas. Bueno, pabor kini sa mga kaalyado sa Presidente sanglit sila man ang mopili sa mga OIC. Alkanse ang mga naa sa oposisyon. Apan di angay moreklamo ang naa sa oposisyon. Mao kini gitawag og weather-weather lang.

Unsay angay buhaton sa mga namunoan sa barangay? Sayon ra. Mangita na daan og mga kaila nga naa sa administrasyon aron maapil sa lista. Buot ipasabot, mahimo lang kini kon nailhan na sila nga oposisyon sila sa una. Kon apil sila sa oposisyon karon, magpaabot na lang sila sa panahon nga pulihan na sab sila sa laing grupo. Ang maayo nilang buhaton, maghuwat nalang sila sa sunod nga piniliay.

Kusog moatake ang ubang mga kaparian sa mga kasaypanan sa kagamhanan ni Duterte. Kon imong paminawon ang ilang gipangsulti, magtuo ka og wa na silay kasaypanan sa ilang mga tagsa-tagsa ka kinabuhi. Apan kasagaran niining mga dagkog baba adunay daghang mga gitagoang sekreto. Kon di sugarol, daghan og bisyo, dunay uyab o anak. Ang uban pa gani nila mogamit og drugas. Nasayod ang mga kadagkoan sa simbahang Katoliko niini. Mao man gani kini ang rason nga sa mga homily, kanunay nila balik-balikon pag-awhag ang mga katawhan nga iampo ngadto sa Ginuo ang mga kasaypanan sa mga kaparian.