You’re my one and only

Gikan ko sa eskuwelahan niadtong tungora. Nagpa- enroll ko para sa next school year. Mopauli na unta ko apan nasundan ko sila si Monsour ug Clarisse nga naglakaw sab sa downtown. Nagkuptanay sila sa kamot. Mihuot ang akong dughan. Nagkoleksyon gyud og girlfriend si Monsour.

Milingi si Monsour ug nakita ko niya. Mobalik unta ko sa agi apan gikamay ko ni Monsour. Seryuso kong miduol sa duha nga nanghunong paglakaw. Morag wa lang nila ni Monsour ug Clarisse nga nakita ko sila sa maong sitwasyon.

“Hi! Kumosta ka, Lorna?”

Hilom kong naglagot kay mapahiyumon kaayo si Clarisse. Si Monsour sab, nagpangidhat nako. Morag mobuto na gyud ang akong dughan sa kaguol.

“O-Okey lang ko.” Miginhawa kog lawom aron paghawan sa kahuot sa akong dughan.

“Kining, Lorna, uyab ko na ron si Clarisse.”

Kaswal lang ang pagsulti ni Monsour. Morag wa lang niya hunahunaa nga gisakitan kaayo ko niadtong higayona.

“M-Mao ba. S-Sige, mouna lang ko ninyo.”

Wa ko na huwata ang tubag sa duha, nagdali kong mibiya nila. Pag-abot ko sa among balay, midiretso kog sulod sa akong kuwarto. Gipagawas ko ang gibati kong kaguol. Mihilak gyud ko pag-ayo.

Milabay ang mga adlaw. Inanay kong gidawat ang reyalidad sa pagka tawo ni Monsour. Yes! He’s my one and

only. Apan tingali, sa pagka karon lang kini. Makita ko ra gihapon ang lalaki nga para gyud nako. Nakigbuwag na ko kang Monsour.

Usa ka hapon, nahiabot si Cherry. Wa na ko masuko niya. Giatubang ko siya sa gamay namong sala.

“Nia ko, Lor, aron klaruhon ang tanan. Kadtong nakita nimo kami si Monsour sa sulod sa fast food, ako gyud tong gusto. Gihangyo ko siya nga di ka niya binuangan tungod kay ikaw lang ang gilaoman sa imong mga ginikanan nga makalingkawas sila sa kalisod. Di mi uyab, uy!”

“Salamat, ha, Cher. Tinuod gyud kang friend.” Mituo ko sa giingon sa akong amiga.

Nahunahuna ko karon nga ang ako lang lawas ang giapas ni Monsour. Wa siyay gugma nako.

Usa ka buntag, gigakos ko sila si Mama ug Papa. Gisubli ko pagsaad nila nga mohuman gyud ko sa akong pagtungha kay gimahal ko kaayo sila. (KATAPUSAN)