Gamiton unya sa pangurakot

Edukasyon. Sa kinatsila pa “mas vale tarde que nunca”. Kon sa ato pa “maayo na lang og nauwahi kay sa wala gyud.” Ang akong gipasabut mao ang bag-o nga balaod RA 10913 o “Anti-Distracted Driving Act” nga gikagubtan ron.

Kining bag-o nga balaod nga nagdili sa mga nagdrayeb og tanan klase nga sakyanan sa paggamit og celphone, magduwa og e-games o tan-aw og television bisan mag-urong sa trapiko ang sakyanan karaan na ni nga balaod sa mga developed country.

Makadaghan na ko makasunod og sakyanan nga magtext o estorya sa telepono ang drayber samtang magdagan ang ilang gidrayban nga sakyanan lakip na niini ang mga nagmotorsiklo.

Kining “Anti-Distracted Driving Act” di lang ni kaayohan alang sa mga nagdrayeb og sakyanan apan alang sa tanan nga mogamit sa kadalanan aron mahalikay kitang tanan sa disgrasya o kadaut.

Hunahunaa nga usa lang ka pamilok sa drayber duna nay mahitabo sa iyang pagdrayeb. Sa usa o duha sa ka segundos nga pagbasa sa text o paggamit sa celphone sa drayber nga ang iyang atensyon wa sa kadalanan daghan na ang mahitabo.

Apan mas maayo tingale nga sa di pa istrikto nga ipatuman ning maong balaod ato sa nga edukahon ang mga drayber sa mga gidili ug wa gidili. Hinuon, kanang mga nagdrayeb og motorsiklo nga magtext o telepono dugay na unta nga gidakop.

Ang ako lang gipanagan-an mohangtud ba ang pagpatuman ning maong balaod. Basi sa atong nasinatian maayo lang ta sa pagsugod. Apan human sa pipila ka buwan o tuig wa nay implementasyon sama sa balaod sa “anti-smoke belching”.

Ang lain nga posible nga mahitabo nga gamiton ning maong balaod sa pangurakot. Ang mga drayber nga dunay kwarta kon madakpan mosuway dayon og tunol og kwarta sa mananakop.

Apan dako ko og pagtuo nga ubos sa panggamhanan ni Presidente Duterte maminosan o mawala na ning pangilkil sa kapulisan o sa mga tawo nga naa sa gobyerno nga dunay gahum sa pagpatuman sa balaod sama ning “anti-distracted driving law”.

Ang lain nga problema mao ning atong sistema sa gobyerno nga kinahanglan pa nga ideputize ang kapulisan aron makapanakop sa mga di motuman sa “Anti-Distractive Driving Law” nga iyaha lang kuno sa Land Transportation Office (LTO).

Ang atong kapulisan gitawag sa iningles nga “law enforcers”. Sa yano nga pagsabut, ang pulis mopatuman sa tanan balaod ning atong nasud ug dunay katungod nga manakop sa mga nakasalaod.

Tinuod, ang LTO mao ang angayan nga mopatuman sa mga balaod mahitungud sa kadalanan ug sakayanan ug manakop sa mga nakasalaod. Apan di ba kuwang man ang LTO sa tawo?