ENFORCER NGA WAY MGA TIIL
Ang kakulian sa panglawas di babag kon anaa sa imong kasing-kasing ang pagserbisyo sa publiko, ilabi na sa pagtampo unsaon pagpatunhay ang nagkagrabe nga problema sa trapiko sa siyudad.
Mao kini ang kasinatian sa 58 anyos nga usa ka traffic enforcer sa Barangay Kasambagan, siyudad sa Sugbo nga mopadagan sa iyang traysikad kada adlaw gamit ang mga kamot. Nganong mga kamot? Tungod kay wa siyay mga tiil.
Si Magdaleno Borces, lumad sa mao nga barangay, natawo nga way mga tiil samtang ang lawas kutob lang sa bugan.
Matod ni Borces nga wala siya mawagtangi og paglaum sa iyang kinabuhi bisan pa man sa iyang kahimtang.Ang pagserbisyo sa kadalanan iyang giiisip nga indulhensya.
Sa wa pa siya mahimong barangay traffic enforcer, usa siya ka traysikad driver.
Apan maayo man ang uban kay dunay mga tiil nga magamit sa pagtindak. Iyang usa ka kamot ang gamiton sa pagpatuyok sa pedal samtang ang pikas kamot maoy iyang gigamit pagtimon sa manubela.
Gipakatawo siya nga ikaupat sa pamilya. Ang iyang amahan usa ka PUJ driver samtang ang iyang inahan, usa ka lab-asera.
Nilang managsuon, siya lang ang adunay deperensya sa lawas.
Kutob lamang siya sa grade 5 sa Mabolo Elementary School. Wa na siya makatiwas human namatay ang iyang inahan nga maoy iyang gabayan sukad siya nagtungha.
Una siya nga nagserbisyo sa pribado nga tunghaan diha sa Kasambagan niadtong 2015 isip enforcer.
Diha siya daplin sa dalan magwara-wara sa iyang mga kamot nga magsinyas nga kabya sa mga sakyanan ug mopahunong sa uban.
Apan sa wala pa niya masayri nga hinungdan, kalit siyang gipahunong sa tunghaan sayo niining tuiga ug wa na siya makadawat og P500 matag semana.
Nakita ang iyang serbisyo ni Barangay Kapitan Franklin Ong sa Kasambagan ug gipasulod isip barangay tanod.
Gidestino siya isip traffic enforcer sugod niadtong Mayo. Nagpasalamat siya kay magdawatan na siya og P4,000 ang buwan isip honorarium.
Si Borces anaa sa eskina F. Cabahug/ML Quezon streets matag adlaw, magtongtong sa tanod outpost pinatuyo sa paghimo alang kaniya.
Di lalim ang iyang gihimo. Sa alas 6 pa lang sa buntag, magsugod na siya sa pagdumala sa trapiko.
Mahuman siya sa alas 11 sa buntag. Mobalik siya sa alas 4 sa hapon hangtod sa alas 6 sa gabii.
Ang bugtong niya nga sakyanan mao ang usa ka traysikad.
Magbinugtong siya sa pagkatkat sa traysikad kay naanad na siyang di abagan.
Siya nangandoy nga unta makaangkon siya og demakina nga traysikad tungod kay sa iyang pangidaron, bug at na ang pagtindak niya gamit ang iyang mga kamot.
"Mangandoy ko nga unta makabaton ko og makina para sa akong biseklita o electric bike aron sayon nako ang pagpadagan," dugang ni Borces.
Usahay dili siya tuhuan sa mga motorista nga iyang senyasan sa pagpahunong sa dili pa ang junction box.
"Sakit unta nga dili sila mopatuo nga hunong abi kay ingon ani lang ko, pero wa koy mahimo, magsakit lang atong dughan, pasagdan ko na lang," matod ni Borces.
May sugyot pa si Borces sa City Traffifc Operations Management (Citom) sa dapit.
Ipatuman ang no left turn sa pipila ka eskina sa dalan F. Cabahug aron masulbad ang trapik sa lugar.
Anaa na ba siyay asawa? Kini mitubag nga unta makabaton na siya og hinigugma. /