Palma miawhag sa katawhan sa pagtanom og kahoy

SuperBalita Cebu - - BALITA - SHEILA C. GRAVINEZ / Reporter

Mihangyo si Arsobispo Jose Palma sa mga pamilya nga himuong kabahin sa mahinungdanon nga selebrasyon sa ilang kinabuhi ang pagpananom og mga punoan sa kahoy.

Kagahapon, siyam ka mga paresan nga nilab-as sa ilang panaad sa kaminyuon sa St. Joseph Chapel sa Archbishop’s Palace ang gipatanom og mga punoan sa kahoy nga gitawag og “Eterni-tree.”

Ang mga kahoy nagsimbulo sa ilang gugma.

Matod ni Palma nga nindot buhaton nga sa matag selebrasyon sa kinabuhi sa tawo sama sa bunyag, kasal, graduation,

birthday o makapasar sa board exam, dunganan usab niini ang pagpananom og mga punoan sa kahoy isip pasalamat.

“Pagpakita nga ang atong kinabuhi connected sa kinabuhi sa atong kalibotan,” pahayag sa arsobispo.

Ang magtiayon nga sila si Glenn, 39, ug Maya Sarroza, 40, 11 ka tuig nang minyo, ug nagpuyo sa lungsod sa Consolacion, usa sa mga nilabas sa ilang panaad sa kasal, nisaad nga amumahon ang ilang gitanom nga punoan sa acacia.

“Kon maniguwang mi so, among tan-awon ang trees, diha namo gi- measure sad at

the same time ang foundation sa among love sa among family,” matod ni Maya.

Si Palma namahayag ang gugma sa magtiayon sama sa tanom nga modagayday sa kalibotan ug kini ipaabot diha sa banay hangtod sa komunidad.

Kagahapon, gilusad usab sa Artsidyosesis sa Sugbo ang bag-ong Archdiocesan Commission on Environmental Concern atol sa kasaulogan sa Environment Month.

Ang CACEC maoy bunga sa International Eucharistic Congress-Committee on Environmental Concern nga natukod niadtong Hunyo 2016 nga maoy gitahasan sa mga programa ug inisyatiba alang sa kalikopan diha sa mga parokya.

Si Cebu Auxiliary Bishop Dennis Villarojo niingon ang CACEC usa na ka permanente nga komisyon sa artsidyosesis nga dunay malahutayon nga mga programa alang sa kalikopan. Ang kalihokan gisugdan pinaagi sa misa nga gipangulohan ni Palma uban ni Villarojo ug Auxiliary Bishop Oscar Jaime Florencio diin gihimo usab ang paglab-as sa marriage vows ug gipanalanginan ang mga sakop sa komisyon.

Si Padre Murphy Sarsonas, pangu sa CACEC, niingon nga 1,600 na ka mga punoan sa kahoy ang nasugdan og tanom sukad niadtong Marso 22 sa San Agustin de Hippo Parish sa Magsico, San Fernando.

Kinatibuk-ang 13,500 ka mga punoan sa kahoy ang tinguha nga itanom sa komisyon sa nagkadaiyang mga parokya sa artsidyosesis.

Si Sarsonas nanghinaot nga pinaagi sa bag-ong naporma nga komisyon mas mapalig-on ang kawsa sa simbahan alang sa pagpanalipod sa kinaiyahan subay sa Laudato Si ni Pope Francis nga nanawagan alang sa pagpakabana sa kalibotan.

Amper Campana

■ paNaNOM. Si Cebu Archbishop Jose Palma nagsud-ong sa magtiayong Glenn ug Maya Sarroza nga miapil sa symbolic nga pagpananom uban sa laing mga magtiayon sa IEC Pavilion. /

Newspapers in Tagalog

Newspapers from Philippines

© PressReader. All rights reserved.