Mga establisemento gikinahanglan nga mohatag og kopya sa kuha sa CCTV

SuperBalita Cebu - - BALITA - / SCG

Mapugos na unya ang mga commercial nga establisemento sa lalawigan sa Sugbo sa paghatag og kopya sa footages o recordings nga kuha sa closed-circuit television (CCTV) camera ngadto sa mga awtoridad nga nag-imbestigar og krimen o panghitabo.

Kini sa higayon moepekto ang ordinansahon nga gipanday ni Provincial Board Member Thadeo Jovito “Jonkie” Ouano, ang “CCTV Footage Policies and Procedures Ordinance.”

Ang ordinansahon gipalabang sa Sangguniang Panlalawigan sa Sugbo sa unang pagbasa sa regular session niadtong Lunes. Naa kini karon sa Committee on Public Safety, Peace and Order nga gipangulohan ni Bokal Sun Shimura.

Si Ouano niingon nakita niya ang panginahanglanon nga pugson ang mga bay patigayon nga mohatag og kopya sa footages o recordings sa ilang CCTV cameras human nabiktima sa skimming ang pipila ka mga depositor sa Landbank of the Philippines.

“Ang atoa ana for investigative purposes to solve the crime,” pahayag ni Ouano sa Superbalita Cebu.

Sa kontrobersiya, ang LBP nagkinahanglan og kamandoan gikan sa korte aron mapagawas ang footage nga nagpakita sa mga skimmer nga nag- withdraw og kwarta gikan sa ATM machine sa LBP.

Sa ordinansahon ni Ouano, nalatid nga limitado lang ngadto sa tukma nga oras o petsa ang video nga gikinahanglan sa imbestigasyon ug husay sa kalapasan nga nahimo nga masilotan sa balaod, ordinansa, o regulasyon.

Ubos sa ordinansahon, ang magdumili, magpapas sa video, makalapas niini, silotan og pagkabilanggo nga di molapas sa usa ka tuig o pamultahon og di molabaw sa P5,000 o ang duha ka silot.

Newspapers in Tagalog

Newspapers from Philippines

© PressReader. All rights reserved.