Lechon sa Carcar gireklamo

SuperBalita Cebu - - BALITA - / HBL

Naalarma ang lokal nga kagamhanan sa dakbayan sa Carcar human nitumaw ang reklamo kabahin sa tinda nga lechon sa lugar.

Adunay reklamo nga di insakto ang timbang sa napalit nga lechon samtang adunay pipila lang ka oras human gipalit nanimaho kini.

Dali kini nga naabot sa mayor ug matod sa tigpamaba sa dakbayan nga si Candice Acuña, gikatakda nga atubangon ni Mayor Nicepuro Apura ang mga naninda og lechon sa ilang merkado.

“Akoa nang giprint- out ang tanang mga post sa Facebook ug ako na siyang gihatagan og kopya,” pahibawo ni Acuña sa Superbalita Cebu.

Matod niya, di kini ang unang higayon nga may ingon niini nga reklamo tungod kay Pebrero 2017 gipatawag ang tanang naninda og lechon sa merkado aron maaksyonan ang mga reklamo.

Human sa panagtagbo, gidili na sa mga stall sa manindahay og lechon ang pagbutang og kaldero nga adunay tubig init diin mao kini ang butangan sa di mahalin nga lechon.

Dugang ni Acuña nga 10 ka mga stall ang anaa sa ilang public market nga naninda og lechon.

Ilado ang Carcar nga usa sa adunay labing barato nga kilo sa lechon, sa kantidad nga P300 matag kilo.

Newspapers in Tagalog

Newspapers from Philippines

© PressReader. All rights reserved.