Adiyos, Melchie Boy!

SuperBalita Cebu - - SUPER BIRADA - Ernesto D. Lariosa

Tuana si magbabalak Melchor Ubal Yburan. Mitalikod na siya sa wa nay pagbalik. Ang nahabilin sa mga suod kaniya mao na lang ang kahaw-ang sa paghandom sa iyang binuhatan.

Milagubo ang kalibutan sa akong dughan dihang nabasa ko ang teks ni magsusulat Lam Ceballos nga si Melchor mipanaw na. Ako modumili unta sa kamatuoran Kinsa may modawat gud diha-diha sa balita nga nagsukip og kasakit.

Kadugay na niadto. Nagkaila mi sa dekada ‘60 kay klasmet sa Universal Radio Institute sa kursong Radio Telephony. Nagkabuwag mi dihang mibalhin ko sa kolehiyo. Niadtong panahuna magbabalak na siya.

Ako lapyo pa kaayo ug mao pay pagpangamang sa mga kagaw sa gugma sa panulat sa akong galamhan. Gibasa ko sa kahimuot ang iyang mga balak nga napatik sa Bisaya. Wa siya masayod nga sa hilom nanganti ko nga mahisama kaniya.

Milakang ang katuigan. Gitukod ni Mel Allego ang Albicarivi Poetry Group sa 1964 sa Southwestern U diin ako naapil. Nagpusot-pusot ang mga balak sa grupo sa Bisaya, Alimyon, Silaw ug Bag-ong Suga ug ubang basahon.

Usa ka adlaw, nagkakita mi. Iya kong gigakos kay nalipay siya nga ako nakamantala nag mga balak sama kaniya. Gikan niadto nagkasuod mig balik nga milig-on pagsamot dihang natukod ang Bathalad diin kami ang founding members.

Gitamod nga premyadong magbabalak si Melchor. Siya ang unang gipasidunggan human ituboy sa Hall of Fame sa Bathalad sa 1989 sa pamalak. Siya naila ug nabantog sa atong katitikan. Siya ning tuiga ang UMPIL Alagad ni Balagtas awardee sa Cebuano Poetry sa nasod.

Bisan sa iyang kalampusan sa panulat nagpabilin siyang mapahiubsanon. Buotan ug way hangin nga nagbagiyos sa iyang ulo. Masinabuton nga kauban namo sa dagang. Buotan nga higala.

Tungod sa iyang kalig-on ug kanunayng batan-on sa damgo, sa lihok ug sa panuwat ako siyang gianggaag Melchie Boy kada tawag ko niya sa telepono ug sa among kinalit nga panagtagbo sa mga dalan sa dakbayan.

Ang among panagsuod milagbas sa among dagang ngadto sa kinauyokan sa panaghigala. Lupig pa namoy managsuon nga nagmatuto sa usa ka damgo nga makatampo pagpatambok sa atong katitikan.

Newspapers in Tagalog

Newspapers from Philippines

© PressReader. All rights reserved.