Kwarta sa SRP

SuperBalita Cebu - - SUPER BIRADA -

Nagpanikad si Mayor Tomas Osmeña nga makabaligya og luna sa South Road Properties (SRP) nga klaro nga hatagan siya sa maong katungod sa konseho karon nga nausab na ang mayoriya pabor kaniya. Sa administrasyon ni kanhi mayor Michael Rama, si Osmeña pwerte nakasaway sa pagbaligya ni Rama sa luna sa SRP ug ang iyang mga sakop sa Bando Osmeña Pundok Kauswagan (BOPK) walay nahimo niadtong tungora dihang minoriya lang sa konseho.

Bisan balido ang tumong ni Rama nganong mobaligya og luna aron makabayad sa nagkadakong interes sa utang ug pag-abli na sa pamatigayon sa SRP aron mas motaas ang kantidad niini, apan sama sa wala kini makita sa lider sa BOPK.

Karong nabalik na sa pagka mayor, murag nakita na ni Osmeña ang kanhi gusto ni Rama niadto ug nagkanayon nga duna na siyay pumapalit sa tulo ka ektaryang luna sa SRP. Sulod sa pipila ka adlaw, gipaabot nga dunay lahugay sa konseho ug yawe kini nga makabaligya na sa SRP.

Tataw nga mitaas na ang kantidad sa pagkakaron human nagsugod na sa paglambo ang dapit human giablihan ni Rama ang negosyo, apan makaluluoy human giinitan sa mayor base sa yang mga miaging pamahayag ug lakang, diin usa sa mga developer nisibog sa iyang interes sa dapit.

Kon makabaligya na si Osmeña sa SRP, seguradong laing negosyo ang motumaw sa dapit ug hinaut nga dili madihado ang dakbayan sa kasabotan sama sa iyang alegasyon sa kanhi administrasyon ni Rama.

Makapangutana kita: Nganong init ang SRP sa mga opisyal sa dakbayan tali sa ubang luna sa dakbayan? Klaro kaayo ang tubag. Dakong kuwarta ang nalambigit sa negosasyon. Isip yanong molupyo, nuntan nato ug magpakabana sa mga mosunod nga dagan sa kalamboan sa dakbayan.

Newspapers in Tagalog

Newspapers from Philippines

© PressReader. All rights reserved.