Anino sa gubat

SuperBalita Cebu - - SUPER BIBO - ERNESTO D. LARIOSA

Nagbuntaog karon ang iyang anino sama sa usa ka bungtod. Mitutok kini niya sa iyang paglingi. Siya kini? Mihuyatid ang kahayag nga buot molakaw, apan napugngan sa naghuwat niyang mga lakang. Nakahigayon si Noy Pilo sa pagsandig sa kahoyng narra Dakong buhi pa ang iyang anino nga mao na usay milingi sa iyang pagtutok. Kalit mihadyong ang mga pulong nga nanggunit sa mga gutlo. Daw nauyog ang kahoy sa kamahinuklugon sa maong panamilit nga mibanda-banda sa iyang kahiladman.

“Tumanon ko, Nay, ang katungdanan sa usa ka kaakuhan ngadto sa yutang natawhan.”

“Apan kuyaw ang gubat, Pilo, di ka makatag-an unsay mahitabo! Pag-ampo, anak.” Katapusan nga pahimangno nga nalitok tungod sa dakong gugma ug kawili sa inahan.

Mituyok ang mga takna sa dughan sa panahon. Mitungha ang gipaabot nga kakuyaw ug kabalaka. Apan natumban na ang sukdanan sa kaisog. Tungod sa gugma sa yutang natawhan um-umon ang bisan unsa. Bisan ang nagpungasi nga mga bala nga nangita sa mga kaaway.

“Lt. Teofilo Arong, bring your platoon and guard the Amorsiko Pass!” mando sa labaw. Hataas ang kakulba ug kahilom sa paghuwat sa mga kaaway.

“Prepare, men, nia na sila!” Iyang singgit nga mitukas sa dakong away nila tali sa mga Hapon nga buot mosud sa katapusan nilang kampo sa Bataan. Ang katapusan niyang nahinumdoman mao ang iyang pag-ambak aron mailog ang machine gun human maigo si Sgt. Larawan ngan nagkupot niini. “Dasmag mo, mga animal! Dasmag mo!” Way hunong ang iyang pagrapido sa mga kaaway hangtod siya anam-anam nga gitukob sa kangitngit.

“Nia ka sa sekretong tambalanan, Sir.” Usa ka matahom nga nars ang misugat sa nagsumparay niyang pananaw. Buot lumsan sa baha sa kasakit ang iyang dughan sa iyang pagkasayod nga siya ray nahabilin sa iyang platoon. Nganong gibuhi pa siya sa Ginuo? Inutil na siya ug di malihok ang iyang lawas. Kaanugon nila ni Diez, Sarabia, Dagatan, Marquez, Enriquez, Acosta, Benjamin, Ang ug Pascual, pulos iyang mga suod sa iyang platoon nga nakabsan sa palad.

Nakita niyang may miduol nga Amerkano nga 4-star General. Gihikap ug gipig-it ang bugnaw niyang kamot. “You are a hero, Major Arong. I am General Jonathan Wainwright, I have promoted you. Get well, soon.” Mitalikod kini nga hinay nga milakang, morag giyunyonan og bug-at nga suliran ang nahuyhoy nga abaga. Sunod adlaw napukan ang Bataan.

NAHIULPOT ang iyang anino dihang kusog ng nanayaw ang mga dahon sa narra. Sa iyang paghangad nagtulilik ang layang mga dahon nga buot motugdon kaniya. Sa unahan sa bantawan hapit na sugdi ang tulumanon sa kasaulogan sa Independence Day sa lungsod, diin siya pasidunggan na usab. Ang kahoy niyang tuong tiil abtik nga milakang samtang nagsunod kaniya ang dako niyang anino. (KATAPUSAN)

Newspapers in Tagalog

Newspapers from Philippines

© PressReader. All rights reserved.