DURANT MAGPABILIN SA WARRIORS

SuperBalita Cebu - - SUPER SPORTS -

Nakatakdang mopirma og bag-ong kontrata si superstar Kevin Durant sa Golden State Warriors, apan ang bag-ong kampiyon sa National Basketball Association (NBA) nawad-an og usa ka legendary player.

Si Durant, kinsa maoy Finals MVP sa bag-uhay lang nahuman nga championship

series diin gidominar sa Warriors ang Cleveland Cavaliers, giingong molugnot sa nahabiling tuig sa iyang kontrata apan mopirma ra kini’g bag-o.

Matod pa nga misugot ra si Durant nga modawat og ubos nga suweldo aron dili molapas ang Warriors sa salary cap sa NBA.

Ang legendary player nga si Jerry West, kinsa sakop sa Warriors executive board, mibiya sa team aron mobalhin sa Los Angeles Clippers isip consultant.

Si West, 79, kinsa nagduwa kaniadto sa Los Angeles Lakers, mao ang magduduwa nga naa sa logo sa NBA.

Mipirma si West og duha ka mga tuig nga kontrata sa Clippers human siya naagni sa tanyag nila ni Clippers owner Steve Ballmer, coach Doc Rivers ug executive vice president Lawrence Frank.

“For them to want me to come here and maybe think I can help, I am really flattered,” batbat ni West. “I think they want to establish their own identity in this town and that is what to me is most important -- establish their own identity and ability to win at the very highest level.” Si Durant, kinsa mibalhin sa Warriors gikan sa Oklahoma City Thunder niadtong Hulyo 2016, mahimong usa ka unrestricted free agent karong Hulyo 1 ning tuiga.

Human niini, ang 10 ka mga tuig nga beterano mopirma og bag-ong kontrata sa Warriors.

Miuyon si Durant nga modawat og gamay-gamay nga suweldo aron aduna pa’y igong pundo ang Warriors alang sa kontrata sa uban nilang mga magduduwa sama nila ni forward Andre Iguodala, Shaun Livingston, Zaza Pachulia ug uban pa. Si Durant aduna unta’y $28

million nga suweldo alang sa sunod season apan misugot kini nga kunhoran og $4 million ang iyang dawatunon.

Sa iyang pagtapon sa Warriors, naangkon ni Durant ang iyang labing unang korona.

Sa miaging finals, si Durant nag- average og 35.2 puntos, 8.4 rebounds ug 5.4 assists, mga numero nga nakatabang og dako aron maangkon sa Warriors ang ikaduha nilang kampiyunato sulod sa tulo ka sagunson nga katuigang pagtaak sa finals.

/ AP Photo

■ FINALS MVP. Gipadayag ni superstar Kevin Durant nga mopirma siya og bag-ong kontrata sa Golden State Warriors. Ang Finals MVP misugot nga kunhoran ang iyang suweldo aron aduna pa’y igong pundo ang Warriors alang sa ubang mga sakop sa bag-ong NBA champions.

Newspapers in Tagalog

Newspapers from Philippines

© PressReader. All rights reserved.