PBA FINALS NA

SuperBalita Cebu - - SUPER SPORTS -

Sugdan na sa San Miguel Beermen ug Talk N’ Text KaTropa ang ilang gikaintapang finals series sa Philippine Basketball Association (PBA) Commissioner’s Cup karong alas 7:00 sa gabii sa Araneta Coliseum.

Sa miaging tulo ka mga tuig, ang Beermen kanunay na lang nakasulod sa finals samtang ang KaTropa karon pa nakataak og balik sa finals human sa lima ka sunodsunod nga mga komperensiya.

Ning puntoha, kuwestiyunable pang makaduwa ang higanteng import sa KaTropa nga si Josh Smith apan bisan pa niini, gilaumang kulbahinam gihapon kining maong panagparang. “Sobra na, tama na, KaTropa naman,” matod pa ni TNT team manager Virgil Villavicencio sa interbyu sa www.pba.ph isip pagpadayag sa ilang tinguha nga pusgayon ang gingharian sa Beermen.

Apan alang sa habig sa Beermen, dili makapuol ang kanunayng pagsulod sa finals ug padayon silang naghinamhinam.

“Hindi nakakasawang mag-champion. Lagi namin asam ito,” matod ni Beermen forward Arwind Santos. Ang Beermen, nga sulod na sa 38 ka mga higayon nga nakasulod sa finals, nagtinguha sa ilang ika-24 nga titulo. Ang KaTropa, nga sulod na sa 17 ka mga higayon nakataak sa finals, naghandom sa ilang ikawalo nga kampiyunato. Padayon pa sab nga nagsubay sa saktong dalan alang sa ikaduha nilang grandslam title, nga una nilang naangkon niadtong 1989 sa panahon nila ni all-time greats Mon Fernandez, Ricky Brown, Samboy Lim ug Hector Calma.

Ang KaTropa ni coach Nash Racela padayon pang naghuwat og pagtugot gikan sa mga doktor kabahin sa sitwasyon ni Smith.

Kon dili gihapon mohatag og pagtugot ang mga doktor, gamiton sa KaTropa ang ilang substitute import nga si Mike Myers.

“I’m just taking it day-byday but two days of rest has helped and like I’ve said I’m ready to play,” matod ni Smith, kinsa adunay angol sa tiil.

“I came here with one goal – to help TNT win the championship.”

Naa o wala si Smith, ang Beermen nangandam sa bisan unsa’y ipakita sa KaTropa.

“We don’t know whom we’re preparing for. We may be preparing for Josh Smith and it would turn out that we would face Myers. So we can really figure them out only after Game One,” pasabot ni Beermen coach Leo Austria.

“One thing for sure, we’re facing a team that is well disciplined in what they do.”

Gipabuhagay ni Austria nga ang ilang bantayan og maayo mao ang KaTropa nga si Jayson Castro.

Sa tanang mga posisyon, makonsiderar nga balanse ra ang duha ka mga kampo ug nagdepende na lang tanan sa ipakitang duwa sa ilang mga ginsakupan.

San Miguel coach Leo Austria

TNT coach Nash Racela

Newspapers in Tagalog

Newspapers from Philippines

© PressReader. All rights reserved.