KALIHOKAN MILANGAY SA PROYEKTO

Usa ning mga kalihokan sa Sugbo nga maoy nakapalangay sa proyekto nga drainage sa Pope John Paul II Ave., sa Barangay Mabolo, dakbayan sa Sugbo. Ang 1.2 kilometro nga proyekto nagsugod niadtong Septiyembre sa nakalabay nga tuig ug gikatakda nga mahuman karong tuiga.

Matod ni Engr. Leonor Nicomedes Jr., Cebu City District Engineer sa Department of Public Works and Highways (DPWH) 7 nga di delayed ang contractor sa pagtrabaho niini apan nalangay kini tungod sa mga nangagi nga kalihokan sa Sugbo.

Posible usab nga malangan na usab kini sunod semana kay ipahunong ang pagtrabaho niini subay sa umaabot nga ASEAN Summit sa Sugbo.

Ang P58.3 milyones nga proyekto nalangan na tungod sa International Eucharistic Congress ug sa niagi nga ASEAN Summit sa Sugbo.

Dugang ni Nicomedes nga bisan og di lakip sa Ironman nga rota ang dapit apan posible usab nga mahunong kini tungod sa kalihokan aron malikayan ang trapiko.

Nasayran nga tulo ka sunodsunod nga proyekto ang gipatuman sa dapit hinungdan nga nadugay kini.

Sayo ning buwana dihang nisuwat si Cebu City Vice-Mayor Edgardo Labella kang DPWH 7 regional director Ador Canlas nga padalian na ang proyekto tungod kay nakadawat og reklamo ang opisyal nga nakapahuot sa trapiko ang proyekto.

Usa sa lakip nga plano sa DPWH 7 mao kining makuha ang road right of way sa eskina F. Cabahug ug J. Luna apan anaa pa sa korte ang acquisition rights niini.

Niadto lang Biyernes dihang gihimo na nga two way sa Cebu City Transportation Office (CCTO) ang usa ka lane sa dan aron moluag ang trapiko.

Matod sa CCTO nga gipaspasan na usab sa Pragmatic Construction, ang kontraktor sa proyekto, ang pagtrabaho sa proyekto aron mahuman na kini og maablihan pagbalik sa publiko.