TALIÑO MANAMILIT
Ugmang adlawa na ang turnover sa pag-ilis sa director sa Police Regional Office 7.
Human gi-promote si Police Chief Superintendent Noli Taliño isip directorial staff for Human Resource and Doctrine Development sa Camp Crame.
Epiktibo niadtong Biyernes ang maong order diin mismo si PNP Director General Ronald “Bato” Dela Rosa ang nag-promote kaniya nga pinirmahan ni Presidente Rodrigo Duterte.
Hulipan si Taliño ni Chief Supt. Jose Mario Espino kinsa gikan sa Civil Security Group -Supervisory Office for Security and Investigative Agencies (SOSIA) sa headquarters sa Crame.
Matod ni Taliño nga posibleng “nakita ni chief yung effort natin dito,” hinungdan nga gi-promote kini.
Dugang niya nga daghang kalampusan ang nahimo sa PRO 7 sulod sa usa ka tuig siya nga nilingkod isip director.
Nakaaresto sila og kapin 10,000 ka mga drug personality lakip na ang high value targets (HVT) ug kapin sa 100,000 usab ang nitahan sa kampanya sa kapulisan batok ilegal nga drugas.
“Initially, hindi natin alam na ganun pala ka grabe,” ang problema sa drugas sa rehiyon. Gipasigarbo usab ni Taliño nga niubos ngadto sa 27% ang index crime lukop Central Visayas.
Si Taliño niasumer sa pagka director sa kapulisan sa Central Visayas niadtong Hulyo 2016.
Nagpasalamat siya sa tanang mga sakop sa PRO 7 hilabi na ang anaa sa ubos tungod sa padayon nga trabaho niini batok ilegal nga drugas ingon man aron mamahimong pabiling peaceful ang rehiyon.
“They are the ones doing the detailed job. Outstanding ang accomplishments.”
Nanghinaot si Taliño nga padayunon ni Espino ang kampanya batok ilegal nga drugas ingon man aron mapun-an pa ang kapin sa 140 ka barangay nga drug cleared sa CV. /