KONSEHAL SA BARANGAY GISIKOP ATOL SA RONDA

Usa ka konsehal sa barangay nga gidudahan usab nga nalambigit sa gidiling drugas ug sa sugal ang nadakpan ug nakuhaag mga armas, mga bala dihang gironda ang iyang ka panimalay sa joint team sa Criminal Investigation and Detection Group-7, Provincial Intelligence Branch sa Cebu Provincial Police Office, Provincial Public Safety Company, Special Weapons and Tactics ug Ronda Police kagahapon.

Kini nahitabo sa alas 2:00 sa kaadlawon atol sa raid sa Brgy. Poblacion ug Botong, lungsod sa Ronda.

Gipusasan sa joint team nga gipanguluhan ni Supt. Joie Yape, Jr., Hepe sa PIB-CPPO, ug Chief Insp. Amancia, sa CIDG-7, mao si Konsehal Romer Abueva, 42, konsehal sa Barangay Ylaya, kinsa nakuhaag .38 revolver, 45 ka kalibre ug mga bala.

Samtang nakaipost sa raid mao sila si Jerek Torres, ex-convict, giiingong sakop sa kriminal gang, ug anaa sa high value target (HVT) sa drugas, ingon man iyang amahan nga si Maximo Torres, ug ilang paryente nga si Godofredo Famor.

Sa balay ni Jerek, nakuha ang kalibre .45, nga may upat ka bala, ingon man usa ka dakong putos sa shabu.

Diha usab sa balay ni Jerek nasikop sila si kanhi konsehal Romel Solis sa Brgy. Anahaw Argao, hingkod ang panuigon kinsa nagsuyop ug nakuhaag drugs paraphernalia.

Aduna usay nakuha nga .38 revolver nga may upat ka bala sa balay ni Famor samtang cal. 45 nga may pito ka bala ug .38 revolver sa panimalay ni Maximo. Si Emia, mibutyag nga si Abueva, usa sa giimbestigar nila tungod sa pagkalambigit niini sa illegal nga drugas.

Si Abueva, giingon nga gambling lord, coordinator sa illegal swertres games, giingong tigsuporta sa mga Private Army Group sa bukid sa Ronda ug gipaluyuhag lokal nga opisyal.

Si Abueva, nga nahinabi sa Superbalita Cebu mihimakak nga nalambigit sa drugas, ug ubang krimen, apan giangkon nila nga coordinator sa Jai Ali kaniadto ubos sa ilang financer nga si Vincent Rojo.

Sa pagkakaron si Abueva, dunay duha ka outlet sa STL, tindahan sa Agrivet sa lungsud sa Ronda, dunay farm sa manok, nagnegosyog mangga, ug nagpa-lending. / GPL