P300,000 nga shabu nasakmit sa Minglanilla

Kapin sa P300,000 nga kantidad sa ilegal nga drugas ang nasakmit sa kapulisan sa tulo ka mga suspetsado nga drug pusher sa managlahi nga operasyon sa lungsod sa Minglanilla.

Napusasan pinaagi sa buybust operation niadtong Sabado sa gabii sila si Lenwel Sacol Tudiot, 24; Gretchen Talisay Quimada, 31; ug Jaylou Delos Reyes Magallon, 32, diin nakuhaan ang tulo og hiniusa nga 29 gramos nga shabu.

Matod sa hepe sa Minglanilla Police nga si Superintendent Dexter Calacar, nga bagong nadiskobrehan nga high value target si Magallon.

Nadakpan kini sa Sitio Panaghiusa 2, Barangay Tunghaan alas 9:30 sa gabii.

Diin nakuha gikan kaniya ang 22 gramos nga shabu nga nagkantidad og P259,600.

Alas 10:45 sa gabii, dihang pito ka gramos usab o nagkantidad og P82,600 ang nakuha gikan nila ni Tudiot ug Quimada dihang nasikop kini sa Sitio Bantayan, Barangay Tungkop.

Matod ni Calacar nga street-level pushers ang ulahing duha nga nasikop. / HBL