PETER LIM GIPATAWAG SA DOJ LABOT SA DRUGAS
Gisilbi sa Criminal Investigation and Detection Group (CIDG) 7 ang subpoena gikan sa Department of Justice sa kaulohan alang sa Sugboanong negosyante nga si Peter Lim.
Pasado ala una kagahapon sa hapon, si Chief Inspector Chuck Barandog maoy nidala sa summon kang Lim sa iyang balay sa Tres Borces Extension, Barangay Mabolo, siyudad sa Sugbo.
Apan wa si Lim busa gipadawat na lang kini sa gwardya sa panimay ni Lim nga si Antonio Rosellosa.
Ang subpoena may kalabutan sa iyang kasong conspiracy nga kalapasan sa Section 26 in relation to Section 5 sa Republic Act 9165 kun Comprehensive Dangerous Drugs Act 2002.
Naa usab sa summon si Kerwin Espinosa, giingong drug lord sa Eastern Visayas nga anak ni anhing mayor Rolando Espinosa.
Si Lim naa sa listahan ni Presidente Rodrigo Duterte, apan gipanghimakak sa Sugboanong negusyante nga siya ang naa sa listahan sa Presidente.
Matod niya nga pareho lang niya og ngan ang Peter Lim alyas Jaguar.
Gipasanginlan usab siya ni Kerwin nga maoy iyang supplier sa drugas, apan iya usab kining gipanghimakak.
Matod sa summon sa DOJ Manila, gimandoan si Lim nga mopakita sa ilang buhatan sa Augusto 14, 2017 ug August 17, 2017 alas 10 sa buntag.
“You are hereby warned that failure on your part to comply with this subpoena shall be considered as waiver to present your defense in the preliminary investigation and the case shall be considered submitted for resulotion,” matod sa mando nga gipirmahan sa duha ka mga state prosecutor nga silang Michael Humarang ug Aristotle Reyes. Ang hepe sa Police Regional Office 7 Chief Supt. Jose Mario Espino nagkanayon nga padayon sila nga nag monitor kang Lim dinhi sa Sugbo.
“Kasama pa rin si Peter Lim to be monitored and to validate whether his alleged link sa illegal drug activities is true or not,” matod ni Espino.
Samtang gisalikway ni Espino nga sundon sa kapulisan sa Central Visayas ang nahitabong dugoong anti drug
operation sa kapulisan sa dakbayan sa Ozamis sa dihang ilang gironda ang balay sa pamilyang Parojinog.
Gipasabot ni Espino nga sa matag police office dunay tagsa-tagsa ka estilo unsaon nila paghimo ang pagpangronda apan magdepende kini sa sitwasyon ilabi na nga kini nakahatag na og peligro sa mga pulis.