13 ANYOS SEX SLAVE SUD SA 4 KA TUIG

Amahan gisikop sa kapulisan tungod sa giingong paglugos sa iyang 13 anyos nga anak nga babaye.

Ang anak nipasangil sa iyang amahan nga nihimo kaniyang sex slave sukad niadtong 9 anyos pa siya.

Ang anak nga wa na makaaguwanta sa gibuhat sa iyang amahan, nieskapo niadtong Dominggo sa kaadlawon ug nidangop sa iyang kabanay.

Si Jose (di tinuod nga ngan), 37 drayber sa traysikol, gipusasan sa mga sakop sa Balamban police station niadtong Dominggo sa buntag.

Si Sr Insp.Ramil Morpos, kinsa nahinabi sa Superbalita Cebu, nagkanayon nga ang biktima upat ka tuig nga gihimong sex slave sa iyang amahan.

Ang bata nitug an sa ilang Women’s and Children Protection Desk(WPCPD) nga sukad siya 9 anyos, gimolistiya na siya sa iyang amahan.

Ang dalagita dunay tulo ka mga igsuon nga lakake, ug nga nailo sa ilang inahan.

Matod pa ni Morpos nga niadtong Dominggo sa kaadlawon, nakamata siya human nabantayan niya nga dunay mitupad kaniya sa paghigda.

Sa pagtan-aw niya, iya kining amahan nga nagsige og hikap sa pribadong parte sa iyang lawas ug gihilabtan na usab siya.

Human niini, nieskapo siya ug nidangop sa iyang iyaan nga iyang gitug-anan nga dugay na siyang gipahimuslan pero nahadlok siya kay gihulga.

Human nasayran sa iyaan, dali niyang gi-report sa kapulisan inabagan sa social welfare

Si Morpos niingon nga sa ilang nahibaw-an gikan sa mga silingan ug opisyal, gikatahong tiggamitan kini og illegal nga drugas.

Posibling sabog pa kini sa ginadiling drugas dihang hilabtan niya ang anak ug hulgaon. /