Election mauswag; kanus-a, hukman pa

Dako ang kahigayunan nga di madayon ang election sa barangay karong Oktubre base sa nasabotan sa gitawag og super majority sa House of Representatives.

Gipadayag ni Kongresista Rodrigo Abellanosa sa Cebu City south district nga atol sa ilang caucus meeting kagahapon, giuyonan nga subling iuswag ang piniliay sa barangay nga ipahigyon karong Mayo sunod tuig.

Matod pa ni Abellanosa nga nagkahiusa ang super majority sa Lower House sa pag-uswag, apan naglibog sila kon kanu-a.

Ang mga kongresista niduso og lima ka petsa kon kanus-a ipahigayon ang eleksyon gikan sa tuig 2018 hangtod sa 2020.

Hangtod nga ilang gipilian ang Mayo 2018 ug Oktubre 2019.

Nahimong sikit ang botasyon sanglit 103 ang niuyon nga sunod tuig ipahigayon ang eleksyon samtang 97 ka kanila nipabor nga sa 2019 na ang piniliay.

Ikaduha nilang gihisgutan mao nga kon angay bang magpabilin ang mga barangay opisyal sa ilang mga distrito o itudlo pinaagi sa appointment, apan hapit tanan sa mga district representative nipabor nga ipabilin ang mga incumbent barangay officials.